{
  "name": "core/freeform",
  "attributes": [],
  "saveContent": "Kjósin er nágrannasvæði Vesturlands, sunnan Hvalfjarðar. Nú er komin út bók um samfélagið í Kjósinni á fyrri tímum í þessum dreifbýlishreppi sem telur um 300 íbúa auk fjölda fólks sem á sumarhús á svæðinu og dvelur þar mikið.\r\n\r\nEn margt hefur breyst á síðastu hundrað árum eða svo í þessari sveit og því er rík ástæða til að miðla heimildum um fyrri tíma. Í hreppnum hefur mikið menningarstarf verið gegnum tíðina og um það fjallar bókin „Þegar Kjósin ómaði af söng“ sem nú hefur litið dagsins ljós. Höfundarnir eru Ágústa Oddsdóttir og Bjarki Bjarnason. Bókin byggir á efni sem Ágústa hefur tekið saman frá árinu 1980, meðal annars með viðtölum við fólk sem þekkti til sögunnar. Það er myndlistarmaðurinn Egill Sæbjörnsson sem myndskreytti verkið og hannaði bókarkápuna ásamt geisladiski sem fylgir með. Egill er sonur Ágústu og heimsótti afa sinn Odd mjög oft upp í Kjós þegar hann var barn og dvaldi þá gjarnan með foreldrum sínum yfir helgi á Neðra-Hálsi.\r\n\r\n<strong>Öflugt söngstarf</strong>\r\nÍ bókinni er til dæmis fjallað um söngmenningu hreppsins, en hún stóð með miklum blóma um langt skeið á liðinni öld og teygði anga sína út á Kjalarnes og suður í Mosfellssveit. Þetta öfluga söngstarf var undir forystu og stjórn Odds Andréssonar föður Ágústu sem var bóndi að Neðra-Hálsi. Oddur stofnaði söngkvartett með bræðrum sínum um 1930 og þar skaut Karlakór Kjósverja sínum fyrstu rótum. Árið 1960 rann hann saman við fjölmennan hóp söngmanna af Kjalarnesi og úr Mosfellsbæ, sem áður höfðu sungið með Karlakórnum Stefni í Mosfellssveit. Oddur var með í stofnun Stefnis og hóf að raddþjálfa kórfélagana haustið 1939. Kórinn var formlega stofnaður í janúar 1940 og var Oddur fyrsti stjórnandi Stefnis árin 1940 til 1944 en kórinn starfaði síðan óslitið fram á sjötta áratuginn, en lagðist þá í dvala. Það voru því margir þjálfaðir söngmenn sem mynduðu Karlakór Kjósarsýslu sem Oddur stofnaði 1960 og starfaði sá kór til 1975 undir hans stjórn.\r\n\r\n<strong>Heimildir frá fyrstu hendi</strong>\r\nBókin á sér rætur í því að upp úr árinu 1980 hóf Ágústa Oddsdóttir að safna efni um söngstarf Odds föður síns og afa Andrésar Ólafssonar með viðtölum við fólk sem mótaði þá sögu og undirbyggði það öfluga sönglíf sem varð til í Kjósinni á 20. öldinni. Einnig safnaði hún rituðum heimildum sem bregða upp svipmyndum af mannlífinu í sveitinni á fyrri tíð - þar sem kjör og aðstæður bændafólks voru með ólíkum hætti en það sem við eigum að venjast nú. Bókin byggir því bæði á rituðum heimildum og fjölda viðtala við eldri Kjósverja og söngfólk í kórum Odds og lýsa frásagnir þeirra sveitabrag, lífsháttum og sönglífi á þessum tíma. Góður kafli er í bókinni um Saurbæjarkirkju á Kjalarnesi sem var vígð á jóladag árið 1904, hún er næstelsta steinsteypta kirkja landsins.\r\n\r\nFjöldi mynda er í bókinni og á geisladisknum sem fylgir eru upptökur frá Ríkisútvarpinu af söng Karlakórs Kjósverja frá 1953 og Karlakórs Kjósarsýslu frá því um 1962.",
  "innerBlocks": []
}