{
  "name": "core/freeform",
  "attributes": [],
  "saveContent": "Fram og ÍA mættust á föstudaginn í úrslitakeppni efri hlutar í 2. deild kvenna í knattspyrnu og var viðureignin á Framvellinum í Úlfarsárdal. Fram hafði fyrir þennan leik aðeins tapað einu sinni í deildinni í allt sumar á meðan ÍA þurfti nauðsynlega á sigri að halda til að eiga möguleika á að komast upp í Lengjudeildina að nýju. Skagakonur mættu grimmar til leiks og Unnur Ýr Haraldsdóttir kom þeim yfir á 19. mínútu en mínútu síðar fékk fyrirliðinn Bryndís Rún Þórólfsdóttir gult spjald eftir að hafa farið inn á völlinn án leyfis eftir aðhlynningu og það átti eftir að verða afdrifaríkt. Ylfa Margrét Ólafsdóttir jafnaði síðan leikinn fyrir Fram á 27. mínútu og skömmu síðar fór allt upp í háaloft. Magnea Guðlaugsdóttir þjálfari ÍA tók sér þá göngutúr inn í boxið hjá Óskari Smára Haraldssyni þjálfara Fram þar sem einhver orðaskipti áttu sér stað og fékk Magnea rautt spjald fyrir athæfið. Tíu mínútum fyrir hálfleik kom Jessica Grace Ray Fram yfir í leiknum og aðeins mínútu síðar fékk Bryndís Rún sitt annað gula spjald og þar með rautt eftir brot, hálfleikstölur 2-1 fyrir Fram.\r\n\r\nÞað var ljóst að einum færri yrði seinni hálfleikurinn erfiður fyrir gestina og það reyndist raunin því eftir rúman tuttugu mínútna leik kom Lára Mist Baldursdóttir heimakonum í þægilega tveggja marka forystu. Skagakonur neituðu þó að gefast upp og Samira Suleman minnkaði muninn fimm mínútum síðar. Þær reyndu síðan hvað þær gátu til að reyna að jafna metin en þrátt fyrir nokkur færi tókst þeim það ekki og naumt tap staðreynd, lokastaðan 3-2 fyrir Fram.\r\n\r\nStaðan í deildinni er nú þannig þegar tveir leikir eru eftir af úrslitakeppninni er Fram efst með 35 stig, Grótta er í öðru sæti með 31 stig, síðan Völsungur með 30 stig, ÍR 29 stig og ÍA með 25 stig. Það er því ljóst að ÍA þarf að bíta í það gallsúra epli að von um sæti í Lengjudeildinni að ári er ekki lengur möguleiki eftir tapið á móti Fram. Markmið liðsins fyrir tímabilið var að komast upp og vonbrigðin því mikil hjá leikmönnum og þjálfurum liðsins.\r\n\r\nNæsti leikur ÍA í úrslitakeppninni er næsta sunnudag gegn Völsungi á PCC vellinum á Húsavík og hefst klukkan 16.",
  "innerBlocks": []
}