{
  "name": "core/freeform",
  "attributes": [],
  "saveContent": "Að ákvörðun Svandísar Svavarsdóttur matvælaráðherra hafa verið kynnt í samráðsgátt stjórnvalda tvö áform um lagasetningu sem ætlað er að draga úr losun gróðurhúsalofttegunda fiskiveiðiflotans og hraða orkuskiptum í samræmi við markmið stjórnvalda. Markmið stjórnvalda er að Ísland nái kolefnishlutleysi og fullum orkuskiptum eigi síðar en árið 2040 og verði þá óháð jarðefnaeldsneyti fyrst ríkja.\r\n\r\nMeðal annars er kynnt frumvarpssmíði þar sem strandveiðisjómönnum verða verðlaunaðir ef þeir búa báta sína þannig út að rafmagn verði aðalaflgjafa. Mega þeir þá sækja um að landa 750 kg í þorskígildum talið af kvótabundnum tegundum í hverri veiðiferð á strandveiðum frá og með næsta fiskveiðiári, í stað 650 kg sem olíuknúnir bátar mega landa. Þannig fái eigendur smábáta eða minni fiskiskipa sérstakan hvata til að fjárfesta í nýjum bátum og skipum eða gera breytingar á þeim þannig að þau gangi fyrir rafmagni með drifrafhlöðum í stað jarðefnaeldsneytis.\r\n\r\nHitt boðaða frumvarp ráðherra snýr að áformum er varða heimildir smærri togskipa til veiða innan 12 mílna beltis fiskveiðilandhelginnar, m.a. um hámarkslengd og vélarafl. „Vélarafl er mælt í svonefndum aflvísi sem er margfeldi af hestöflum aðalvélar og þvermáli skrúfu viðkomandi skips. Í frumvarpinu er lagt til að gerðar verði breytingar á þessum reglum til að greiða fyrir orkuskiptum og þá sérstaklega notkun tvíorkuskipa í fiskveiðum,“ segir í tilkynningu frá matvælaráðuneytinu.",
  "innerBlocks": []
}