{
  "name": "core/freeform",
  "attributes": [],
  "saveContent": "KA og ÍA mættust í 17. umferð Bestu deildar karla í knattspyrnu í gær og fór leikurinn fram á Greifavellinum á Akureyri. Leikurinn fyrsta hálftímann var nokkuð fjörugur þar sem bæði lið fengu nokkur færi en heimamenn í KA þó líklegri til að skora fyrsta markið. Eftir rúman hálftíma leik misstu Skagamenn Hlyn Sævar Jónsson af velli með beint rautt spjald þegar hann braut á Hallgrími Mar Steingrímssyni sem var kominn einn inn fyrir vörn Skagamanna. Fram að hálfleik voru norðanmenn sterkari en tókst ekki að komast á blað og markalaust í hálfleik, 0-0.\r\n\r\nEinum fleiri herjuðu KA menn áfram á ÍA í seinni hálfleik en leikmenn ÍA voru skipulagðir og þéttir fyrir í sínum varnarleik. Það var síðan á 68. mínútu að fyrsta mark leiksins leit dagsins ljós. Eftir mikinn darraðardans í vítateig Skagamanna fékk Nökkvi Þeyr Þórisson sendingu við vítateiginn og renndi boltanum í fjærhornið. Sjö mínútum síðar voru KA menn komnir í tveggja marka forystu þegar Nökkvi Þeyr fékk boltann fyrir framan teig ÍA og renndi boltanum á Hallgrím Mar sem gerði engin mistök þegar hann færði boltann yfir á vinstri löppina fram hjá varnarmanni ÍA og sendi Árna Marinó í vitlaust horn, staðan 2-0 fyrir KA. Fjórum mínútum fyrir leikslok gulltryggði síðan títtnefndur Nökkvi Þeyr sigurinn fyrir KA þegar hann skaut boltanum í fjærhornið eftir hraða sókn og skoraði sitt 13 mark í deildinni í sumar, lokatölur 3-0 fyrir KA.\r\n\r\nSkagamenn töpuðu þarna sjöunda leik sínum í röð í deildinni sem er það þriðja mesta hjá þeim á Íslandsmóti. Þeir töpuðu átta leikjum í röð árið 1990 og níu leikjum í röð árin 1966 og 1967 þar sem þeir féllu í fyrsta sinn seinna árið. Skagamenn eru sem fyrr neðstir með átta stig, tveimur stigum á eftir Leikni Reykjavík sem á þó tvo leiki til góða. Næsti leikur Skagamanna er heimaleikur á móti ÍBV næsta sunnudag og hefst klukkan 17.",
  "innerBlocks": []
}