Þorbjörn Oddsson og Jóhanna B. Þorvaldsdóttir, geitabændur á Háafelli.

Geitfjársetur hélt tíu ára afmælishátíð

Að Háafelli í Hvítársíðu í Borgarfirði búa hjónin Jóhanna Þorvaldsdóttir og Þorbjörn Oddsson. Fyrir tíu árum síðan stofnuðu þau Geitfjársetur að Háafelli en þau hófu að bjarga íslenska geitastofninum um síðustu aldamót og hefur starfsemin vaxið og dafnað síðan. Yfir sumartímann er setrið opið þar sem heimsækja má geiturnar og kynnast afurðum þeirra sem seldar eru á staðnum en geitaísinn hefur t.d. notið mikilla vinsælda. Þau vilja fræða almenning, uppræta gamlar mýtur ásamt því að kynna geitaafurðir og þeirra nýtni.

Langaði alltaf í geitur
Jóhönnu hefur alltaf langað í geitur en hún segist hafa valið réttan tíma til að fá samþykki bóndans fyrir geitabúskapnum. ,,Ég hef alltaf verið hrifin af geitum en ég mátti ekki fá geitur sem krakki. Ég fékk svo loksins geitur þegar bóndinn var nógu ástfanginn og sagði já við öllu, en hann hefur lært með tímanum að neita sumu,“ segir Jóhanna og hlær. ,,Árið 1999 þegar við tókum síðustu kollóttu geiturnar sem voru þá á leiðinni í sláturhús, varð þetta svona hugsjón að reyna að bjarga þeim hluta stofnsins, kenna fólki um afurðir og láta fólk vita að þessi stofn væri til. Það voru margir Íslendingar sem höfðu ekki hugmynd um tilvist íslenska geitastofnsins. Svo eru þessar gömlu mýtur sem enn eru viðloðandi um að þær séu óalaðandi, ólíðandi, óætar, geðvondar og illa lyktandi. Þessari hugsun þurfti náttúrulega að breyta og það hefur gengið nokkuð vel. Margir koma núna á hverju ári, eiga kannski geit í fóstri og fá þá fríar heimsóknir,“ segir Jóhanna.

Mannauðurinn það besta
Jóhanna og Þorbjörn eru með 200 geitur á veturna og vinna osta á staðnum. ,,Við erum með 200 geitur yfir veturinn og svo eru 198 kiðlingar. Búskapurinn gengur vel og svo erum við líka með ostagerð. Við erum með þrjár stúlkur sem starfa hjá okkur í sumar og svo erum við búin að mynda félag með nokkrum börnum okkar í kringum búskapinn. Elsa og Reynir eru með okkur í félagsbúi og við sjáum saman um búskapinn ásamt tengdasyni okkar honum Mumma en hann er framkvæmdarstjóri Háafell Geitfjárseturs og er hvað mest með okkur í þessu. Maður er ótrúlega þakklátur fyrir að þau vilji taka við og vera með okkur í þessu. Hinir krakkarnir eru líka öll meira og minna viðloðandi, þannig að mannauðurinn er það besta,“ segir Jóhanna þakklát.

Mikil aðsókn á afmælishátíðina
Mikill mannfjöldi sótti afmælishátíð Geitfjársetursins síðasta laugardag sem fagnaði þá tíu starfsárum. ,,Það komu um 200 manns bara fyrstu tvo klukkutímana svo mannfjöldinn var mikill yfir daginn. Það eru allir svo dásamlegir, veðrið var okkur í hag þannig við erum alsæl með daginn. Við vorum með hoppukastala, sparkbíla og fínt leiksvæði. Garðurinn var opinn og þar mátti skoða rósirnar mínar. Sigrún, vinkona mín frá Stórhóli í Lýtingsstaðarhreppi, var með smakk af allskonar kjötafurðum. Svo vorum við með jógúrt í fyrsta skipti núna úr geitamjólk og geitaísinn er búinn að vera mjög vinsæll líka en hann hefur sennilega verið vinsælasta fóðrið hérna. Við erum að sjálfsögðu með osta og vorum að fá nýja tegund af pylsum líka. Geiturnar eru svo alsælar með allt þetta klapp en mig langar að koma á framfæri þökkum fyrir daginn því þetta hefur verið dásamlegt,“ segir Jóhanna að lokum.

 

 

 

Líkar þetta

Fleiri fréttir

Mokveiði í dragnót

Dragnótarbáturinn Steinunn SH frá Ólafsvík lenti heldur betur í mokveiði rétt undan Ólafsvík á sunnudaginn. Köstuðu skipverjar dragnótinni aðeins þrisvar... Lesa meira