{
  "name": "core/freeform",
  "attributes": [],
  "saveContent": "Dagbók lögreglunnar á Vesturlandi er þéttskrifuð eftir annasama helgi Írskra daga á Akranesi. Minniháttar umferðaróhapp varð á Skólabraut og annað á Suðurgötu á móts við gatnamót Vitateigs. Vegna hátíðarhaldanna og mikils fjölda í bænum var viðbótarmannskap lögreglu bætt við á Akranesi alla helgina og að jafnaði áhafnir á fimm bílum sem sinntu fjölmörgum útköllum.\r\n\r\nMeðal annars var kvartað undan rafskútum sem ekið var frjálslega um götur bæjarins af drukknu fólki. Ýmsir óttuðust að fólkið færi sér að voða og vildu fá lögreglu til að kanna ökuhæfnina. Þá var að sögn lögreglu almennt mikið um ölvunar- og hávaðaútköll sem tengdust samkvæmum víðsvegar um bæinn. Einhverjir smápústrar urðu og fólk dettandi á höfuðið og meiða sig. Þá þurfti að koma ofurölvi ungmennum til bjargar úr skurði við Innnesveg á föstudagskvöldinu og voru þau flutt á sjúkrahús. Flest útköll lögreglu voru hins vegar á eða nærri skemmtisvæði Lopapeysunnar við Akraneshöfn, þar sem nokkur þúsund manns komu saman á laugardagskvöldinu. Níu ölvunarakstrar voru færðir til bókar lögreglu, allir á eða í kringum Akranes. Eitt umferðaróhapp var þar sem ölvaður ökumaður átti í hlut. Bíl var velt skammt frá afleggjaranum að Akrafjallsvegi. Minniháttar meiðsli urðu í því óhappi. Tvær skráðar líkamsárásir voru á laugardeginum og aðfararnótt sunnudags. Eitt kynferðisbrot var skráð í tengslum við Lopapeysuna.",
  "innerBlocks": []
}