Í dag var við hátíðlega athöfn í Hafbjargarhúsinu á Breið á Akranesi kynnt niðurstaða í veglegri hönnunarsamkeppni á um ellefu hektara svæði á Breiðinni. Það er Breið þróunarfélag sem hélt utan um samkeppnina í samvinnu við Brim hf og Akraneskaupstað. Dómnefnd hefur nú metið þær 24 tillögur sem sendar voru inn til keppni, en á bak við þær tillögur eru yfir 50 aðilar, að miklum meirihluta alþjóðlegar arkitekta-, hönnunar- og skipulagsstofur. Markmið samkeppninnar var að fá fagaðila til að leggja fram tillögur í samræmi við þá framtíðarsýn að svæðið verði íbúðabyggð fyrir ólíka aldurshópa í bland við atvinnusköpun með áherslu á hátækni, nýsköpun og sjálfbærni. Framtíðarsýn yrði forsenda breytinga á aðal- og deiliskipulagi svæðisins sem nú er skilgreint sem hafnar- og iðnaðarsvæði. Guðmundur Kristjánsson forstjóri Brims og formaður dómnefndar kynnti vinningstillögur og afhenti verðlaun. Í hlut verðlaunatillögunnar falla 15 milljónir króna í verðlaunafé, annað sætið fær fimm milljónir króna og þriðja sætið þrjár milljónir. Einnig ávarpaði Sævar Freyr Þráinsson bæjarstjóri gesti.

Vinningstillagan kom frá Arkþing/Nordic

Fyrstu verðlaun í samkeppninni, og sú tillaga sem nú verður áfram unnið með, fékk Arkþing/Nordic í samstarfi við Eflu verkfræðistofu. Í umsögn um tillöguna segir:

„Lifandi samfélag við sjó, látlaus og skýr tillaga sem leggur til blandaða uppbyggingu á Breiðinni. Atvinnusvæði er byggt upp ofan við Steinsvör og núverandi byggingar eru endurnýttar. Útisvæði við vörina virkar sannfærandi með veitingasölu og annarri starfsemi. Íbúðabyggðin er fjölbreytt en þróa mætti húsagerðir enn frekar með tilliti til þéttleika og skjólmyndunar. Strandstígur liggur umhverfis nýju byggðina og tengist fjölbreyttri uppbyggingu og afþreyingu við sjóinn. Annar stígur liðast í gegnum hverfið frá norðri til suðurs og tengist leiksvæðum, gróðurhúsi og veitingatorgi. Staðsetning hótels og baðlóns sunnarlega á nesinu virkjar það svæði vel og býður upp á spennandi þróunarmöguleika. Styrkur tillögunnar er einfaldleiki með skýru samgönguneti og góðum tengingum við sjóinn. Staðsetning allra lykilþátta er skynsamleg og virðist áreynslulaus. Tillagan er jarðbundin og raunsæ og býður upp á mikla möguleika til frekari þróunar. Mannvirki við Skarfavör og Steinsvör sem ganga í sjó fram þarf að skoða með tilliti til ágangs sjávar.“

: Guðmundur Kristjánsson ásamt fulltrúum verðlaunahafa fyrir vinningstillöguna.

: Fjölmenni fylgist með þegar úrslit voru kynnt.

: Næstu vikur verður hægt að kynna sér tillögurnar sem bárust í keppnina á veggjum Hafbjargarhússins.

: Hér ræðast þeir við Einar Brandsson bæjarfulltrúi, Sævar Freyr Þráinsson bæjarstjóri og Guðmundur Kristjánsson forstjóri Brims.

Arkþing sigurvegari í hönnunarsamkeppni um Breið á Akranesi