Niðurstaða hugmyndasamkeppni og íbúafundur á Breið

Í byrjun næstu viku verða tvennir viðburðir sem tengjast Breiðarsvæðinu á Akranesi.

Í fyrst lagi verður kynning mánudaginn 27. júní klukkan 15 þar sem Breið þróunarfélag í samstarfi við Brim hf., Akraneskaupstað og Arkitektafélag Íslands, mun kynna niðurstöður hugmyndasamkeppni í Hafbjargarhúsinu á Breið. Kynntar verða niðurstöður dómnefndar í hugmyndasamkeppninni um framtíðarskipulag á Breiðinni, en alls bárust 24 tillögur í keppnina sem var öllum opin. Formaður dómnefndar mun fara yfir vinningstillögurnar en hægt verður að sjá allar tillögurnar á staðnum auk þess sem þær verða til sýnis á heimasíðu Arkitektafélags Íslands og Breiðar þróunarfélags.

Í öðru lagi verður íbúafundur um framtíðarsýn á Breiðinni haldinn þriðjudaginn 28. júní kl. 17:00 í Bíóhöllinni. Á dagskrá er ávarp bæjarstjóra, Guðmundur Kristjánsson forstjóri Brims heldur erindi og tónlistaratriði frá Akranesi verða í boði. Þá mun framtíðarsýn Running Tide verða kynnt á Akranesi í erindi sem nefnist „Ísland verði suðupottur loftslagsverkefna á heimsvísu“. Það flytja Kjartan Ólafsson, framkvæmdastjóri Transition Labs og Kristinn Lár Hróbjartsson, framkvæmdastjóri Running Tide. Loks mun Marty Odlin, stofnandi Running Tide ávarpa gesti. Allir eru velkomnir á báða þessa viðburði.

Líkar þetta

Fleiri fréttir