{
  "name": "core/freeform",
  "attributes": [],
  "saveContent": "Guðmundur Eyþór Már Ívarsson hafnarvörður á Arnarstapa segir að þessa dagana sé mikið líf í og við höfnina. Stöðugur straumur ferðamanna er á svæðinu til þess að fanga fegurðina og skoða sig um í náttúrunni, svo sem að skoða fugla af fjölmörgum tegundum og fara í gönguferðir. Gönguleiðin frá Arnarstapa að Hellnum er til að mynda geysivinsæl auk þess sem ferðamenn njóta veitinga á svæðinu.\r\n\r\nGuðmundur bætir við að strandveiðar gangi mjög vel og ná strandveiðisjómenn skammtinum á skömmum tíma enda eru fengsæl fiskimið skammt frá höfninni. Núna eru 39 bátar í höfninni, sem er frekar lítil frá náttúrunnar hendi, en talsverðar framkvæmdir hafa þó verið gerðar undanfarin ár en það er stutt síðan höfnin var dýpkuð. Þrátt fyrir allan þennan bátafjölda segir Guðmundur að allt gangi þetta vel og samvinna sjómanna sé til fyrirmyndar. Sjómenn jafnt sem starfsmenn eru því almennt sáttir með gang mála.",
  "innerBlocks": []
}