{
  "name": "core/freeform",
  "attributes": [],
  "saveContent": "Það sem af er þessu ári hafa fuglaflensuveirur af gerðinni H5 greinst í þrettán sýnum úr villtum fuglum víðsvegar á landinu og heimilishænum á einum stað. Að sögn starfsmanna Matvælastofnunar er beðið eftir niðurstöðum um meinvirkni og nánari greiningu á gerð veiranna. Hætta á smiti frá villtum fuglum í alifugla er mikil og því mjög brýnt að alifuglaeigendur gæti ýtrustu sóttvarna.\r\n\r\nAf þeim þrettán sýnum úr villtum fuglum sem fuglaflensa greindist í voru fimm úr súlum á Reykjanesi, þrjú úr súlum á Snæfellsnesi, eitt úr hrafni á Skeiðum, eitt úr heiðagæs við Höfn í Hornafirði, eitt úr skarfi á Kjalarnesi, eitt úr grágæs á Akureyri og eitt úr svartbak á Húsavík.  Niðurstaða rannsókna á einu sýni úr álft í Laugardal í Bláskógabyggð var ekki afgerandi en ekki hægt að útiloka smit. Í tveimur sýnum til viðbótar voru niðurstöður rannsóknar ófullnægjandi, eitt úr tjaldi við Apavatn í Bláskógabyggð og eitt úr heiðargæs í Grímsnesi. Önnur sýni hafa verið neikvæð. Nánari niðurstöður eru birtar í kortasjá Matvælastofnunar.\r\n\r\n„Þessi útbreiðsla undirstrikar að smithætta frá villtum fuglum er mikil þessa daga fyrir alla alifugla og aðra fugla í haldi. Strangar sóttvarnir, sem miða að því að fyrirbyggja smit frá villtum fuglum, þurfa að vera innleiddar alls staðar þar sem fuglar eru í umsjón manna. Nánar má lesa um aukið viðbúnaðarstig, sóttvarnir og fleira á upplýsingasíðu Matvælastofnunar um fuglaflensu. Mikilvægt er að fylgjast mjög vel með heilsufari alifugla og annarra fugla í haldi, og hafa án tafar samband við Matvælastofnun ef upp kemur grunur um veikindi. Matvælastofnun kannar þá heilsufar í grunsamlegum fuglum, tekur sýni og gerir ráðstafanir eftir því sem við á.“\r\n\r\nSamkvæmt mati Sóttvarnastofnunar Evrópu (ECDC) og Matvælaöryggisstofnunar Evrópu (EFSA) er smithætta fyrir fólk af þessum veirum lítil. Tilfelli í fólki eru afar sjaldgæf og aðeins eftir mikið návígi við smitaða fugla án þess að sóttvarna hafi verið gætt. Engin dæmi eru um að fólk smitist við neyslu afurða alifugla eða villtra fugla.",
  "innerBlocks": []
}