{
  "name": "core/freeform",
  "attributes": [],
  "saveContent": "Á hádeginu í gær, á sumardaginn fyrsta, bauð Hvalfjarðarsveit til samkomu á Leirá í Leirársveit, en það var menningar- og markaðsnefnd sveitarfélagsins sem skipulagði viðburðinn. Blíðskaparveður setti svip sinn á samkomuna og sumarkomuna og þar dreif að fjöldi fólks. Linda Björk Pálsdóttir sveitarstjóri bauð gesti velkomna. Greindi hún frá því að söguskiltið á Leirá væri þriðja af a.m.k. tíu skiltum sem sett verða upp í sveitarfélaginu í þessum áfanga, undir heitinu „Merking sögu- og merkisstaða í Hvalfjarðarsveit.“ Áður hafa verið afhjúpuð skilti við Saurbæ og Miðgarð. Það var síðan Katrín Jakobsdóttir forsætisráðherra sem afhjúpaði söguskiltið sem stendur við garðvegg kirkjugarðsins á Leirá.\r\n\r\nAð afhjúpun lokinni sögðu Ásgeir Kristinsson frá Leirá og börn hans þrjú frá sögu staðarins. Sú frásögn var litrík, persónuleg og fræðandi. Fléttuðu þau saman sögunni allt frá fyrstu tíð og þeirra búsetu á staðnum. Að því loknu var sest inn í kirkjuna þar sem kór Saurbæjarprestakalls söng nokkur lög undir stjórn og við undirleik Zsuzsanne Budai. Loks var boðið upp á veitingar sem sóknarnefnd Innra-Hólmskirkju sá um í gamla íbúðarhúsinu á Leirá sem nú hefur verið gert myndarlega upp.\r\n\r\n<strong>Fróðlegir sögumolar</strong>\r\n\r\nÁ nýja söguskiltinu koma fram upplýsingar um sögu Leirárkirkju, prentsmiðjuna á Leirárgörðum og Beitistöðum og sagt frá þeim Magnúsi Stephensen og Jóni Thoroddsen sem þar hafa búið. M.a. er sagt frá því að heimildir eru um kirkju á Leirá frá því um 1200. Kirkjan hafi frá öndverðu staðið nærri íbúðarhúsum á bænum, líkt og núverandi kirkja frá 1914 gerir. Þá er einnig greint frá prentsmiðjurekstrinum á Leirárgörðum en í prentsmiðjunni var um 1800 prentað <em>„Einfalt matreiðslu vasakver, fyrir heldri manna húsfreyjur.“</em> Prentsmiðjan var flutt úr Hrappsey að Leirárgörðum, en um 1800 sameinaðist hún Hólaprentsmiðju. Magnús Stephensen (1762-1833) varð fljótt einvaldur í bókaútgáfu hér á landi. Auk Magnúsar er sagt frá rithöfundinum og sýslumanninum Jóni Thoroddsen (1818-1868) sem bjó á Leirá í um fimm ár. Þekktastur er Jón fyrir að hafa skrifað Mann og konu og Pilt og stúlku en sú síðari er talin fyrsta íslenska skáldsagan. Katrín Jakobsdóttir forsætisráðherra fjallaði í ávarpi sínu um Jón, sem er forfaðir hennar sjálfrar.",
  "innerBlocks": []
}