{
  "name": "core/freeform",
  "attributes": [],
  "saveContent": "Í gærkvöldi var haldin lokahátíð Upplestrarkeppni grunnskólanna á Akranesi og fór hún fram í Tónbergi fyrir nánast fullu húsi. Þar var boðið upp á upplestur tólf nemenda úr 7. bekkjum Brekkubæjarskóla og Grundaskóla. Að auki flutti rithöfundurinn Eva Björg Ægisdóttir ávarp, flutt voru tónlistaratriði nemenda úr Tónlistarskóla Akraness og Viktoria Emilia Orlita, nemandi úr 7. bekk Brekkubæjarskóla, las upp ljóð á pólsku. Vilborg Þórunn Guðbjartsdóttir, deildarstjóri í Brekkubæjarskóla, var kynnir á hátíðinni og fórst það vel úr hendi.\r\n\r\nDagur íslenskar tungu, 16. nóvember, markaði upphafið að upplestrarkeppninni. Þá hófst ferlið formlega og allir nemendur 7. bekkjar tóku til við æfingar á upplestri á ljóðum og sögum. Um mánaðamótin febrúar/mars voru haldnar undankeppnir í grunnskólunum og sex bestu lesararnir úr hvorum skóla valdir til að lesa á lokahátíðinni. Lesefnið sem lá til grundvallar á lokahátíðinni samanstóð af texta úr bókinni Akam, ég og Annika, ljóðum úr ýmsum áttum, og ljóðum sem krakkarnir völdu sjálfir. Þriggja manna dómnefnd fékk síðan það erfiða verkefni að velja besta lesarann úr hvorum skóla fyrir sig. Dómnefndina skipuðu þau Halldóra Jónsdóttir, Jakob Þór Einarsson og séra Þráinn Haraldsson.\r\n\r\nAllir þátttakendur stóðu sig með stakri prýði og eiga mikið lof skilið fyrir frábæra frammistöðu. Leikar fóru þó þannig að Lilja Dís Lárusdóttir var valin upplesari Brekkubæjarskóla og Tinna Björg Jónsdóttir upplesari Grundaskóla.\r\n\r\nEinnig voru afhentar viðurkenningar fyrir teikningar á boðskort sem var sent á gesti hátíðarinnar. Það voru þær Helena Ósk Somlata Einarsdóttir og Lilja Dís Lárusdóttir sem fengu þær viðurkenningar.\r\n\r\n[caption id=\"attachment_52016\" align=\"alignnone\" width=\"600\"]<img class=\"wp-image-52016 size-medium\" src=\"https://skessuhorn.is/wp-content/uploads/2022/03/Upplestrarkeppni-grunnskolanna-for-fram-i-Tonbergi3-600x450.jpg\" alt=\"\" width=\"600\" height=\"450\" /> Hópurinn sem las upp með viðurkenningar sínar.[/caption]",
  "innerBlocks": []
}