{
  "name": "core/freeform",
  "attributes": [],
  "saveContent": "Í október á síðasta ári auglýstu Rótarýklúbbur Akraness og Tónlistarskólinn á Akranesi tónleika sem halda átti til minningar um Hallbjörgu Bjarnadóttur (1917–1997) söngkonu og frumkvöðul í djasstónlist á Íslandi. Hún ólst upp á Akranesi og átti þar heima fram á unglingsár. Tónleikarnir áttu að vera hluti af dagskrá Vökudaga. Þegar þeir dýrðardagar voru nýgengnir í garð gekk kóvid bylgja mikil yfir bæinn og útilokaði allt samkomuhald. Ekki var samt hætt við tónleikana heldur var þeim frestað um ótiltekinn tíma. Nú virðist þeim sem standa að undirbúningi tónleikanna loksins óhætt að halda þá og verða í Tónbergi, sal Tónlistarskóla Akraness, í kvöld sunnudagskvöldið 6. mars klukkan 20. Fram kemur hópur listamanna: Andrea Gylfadóttir, Brynja Valdimarsdóttir, Jónína Björg Magnúsdóttir, Davíð Þór Jónsson, Eðvarð Lárusson, Óskar Þormarsson, Valdimar Olgeirsson og nemendur Tónlistarskóla Akraness. Kynnir verður útvarpsmaðurinn vinsæli, Ólafur Páll Gunnarsson. Miðasala er við innganginn.\r\n\r\n<strong>Björt mey og hrein</strong>\r\n\r\nHallbjörg var frumkvöðull í djasstónlist á Íslandi. Rödd hennar vakti athygli víða um lönd og hún starfaði í Bandaríkjunum í Danmörku og fleiri Evrópulöndum – kom meðal annars fram á tónleikum í Royal Albert Hall í London 1947. Hér á landi muna líklega flestir eftir flutningi hennar á eigin lögum við „Vorvísu“ Jóns Thoroddsen og ljóðið „Björt mey og hrein“ eftir Stefán Ólafsson frá Vallanesi.\r\n\r\nHallbjörg fæddist árið 1917. Foreldrar hennar fluttu með hana barnunga á Akranes. Þröngt var í búi hjá þeim og skömmu síðar komu þeir henni í fóstur hjá hjónunum Kristínu Jónsdóttur og Jóni Ólafssyni sem bjuggu að Brunnastöðum. Það hús stendur enn við Laugarbraut og er númer 19, sem sagt fjórða húsið í norðaustur frá tannlæknastofunni. Þar átti hún heima fram yfir fermingu en snemma á unglingsárum fór hún fyrst til Reykjavíkur og svo til Danmerkur í leit að tækifærum til að syngja og læra söng. Þótt veran í Danmörku byrjaði á tómu brauðstriti, mest við eldamennsku og þrif, reis frægðarsól Hallbjargar hratt þar í landi og vel fyrir tvítugt var hún tekin að koma fram á tónleikum í Kaupmannahöfn.\r\n\r\n<strong>..og það heyrðist í mér!</strong>\r\n\r\nStefán Jökulsson skráði ævisögu Hallbjargar eftir frásögn hennar sjálfrar. Bókin kom út 1989 og heitir Hallbjörg eftir sínu hjartans lagi. Þar segir frá bernsku hennar á Akranesi (á bls. 41): „Ég var hávær að öllu leyti ef ég á annað borð opnaði munninn. Og hann var oft opinn því ég var alltaf syngjandi. En mér nægði ekki að syngja og tralla eins og börn gera sjálfum sér til yndisauka. Ég vildi syngja fyrir fólk, syngja fyrir áheyrendur. Ég opnaði alla glugga heima á Brunnastöðum upp á gátt og söng hástöfum svo fólk heyrði í mér. Og það heyrðist í mér! Þegar vindátt var mér í hag barst söngurinn langar leiðir.“\r\n\r\nÍ sömu bók segir frá því að bæði fyrir og eftir seinni heimsstyrjöld bjó Hallbjörg í útlöndum en hún var hér á Íslandi á stríðsárunum og söng bæði fyrir landa sína og fjölda hermanna sem hingað komu frá Bretlandi og Bandaríkjunum: „Ég söng alltaf fyrir fullu húsi en margir voru á móti djasstónlist… Til blaðanna bárust lesandabréf… Ég man til dæmis eftir bréfi frá „söngelskri húsmóður“ sem fáraðist yfir þessari samviskulausu söngkonu sem vildi hefja „frumskógamúsík“ til virðingar. Svo bætti þessi svokallaða söngkona gráu ofan á svart með því að „dilla sér“ meðan hún kyrjaði þennan ósóma.“",
  "innerBlocks": []
}