{
  "name": "core/freeform",
  "attributes": [],
  "saveContent": "Á síðustu árum hefur hættan á gróðureldum aukist talsvert hér á landi m.a. vegna breytinga í veðurfari, vaxandi gróðursældar, minnkandi búfjárbeitar og fleiri þátta. Samkvæmt tölfræði Húsnæðis- og mannvirkjastofnunar (HMS) eru gróðureldar orðnir stór áhættuþáttur í náttúrunni hér á landi, enda geta þeir valdið miklu eigna- og manntjóni og geta skaðað mikilvæga innviði. Á meðfylgjandi grafi má sjá að fjöldi gróðurelda hefur næstum því þrefaldast á seinustu árum.\r\n\r\n[caption id=\"attachment_51192\" align=\"alignnone\" width=\"600\"]<img class=\"wp-image-51192 size-medium\" src=\"https://skessuhorn.is/wp-content/uploads/2022/02/Taeplega-200-skradir-grodureldar-a-seinasta-ari_2-600x305.jpg\" alt=\"\" width=\"600\" height=\"305\" /> Hér má sjá þróun í fjölda gróðurelda frá árinu 2018.[/caption]\r\n\r\n<strong>Mikil hætta um seinustu áramót</strong>\r\n\r\nÁ suðvesturhorni landsins var varað sérstaklega við hættu á gróðureldum í kringum síðustu áramót sökum veðurfars og fólk beðið um að fara með gát við notkun flugelda og meðferð elds. Þrátt fyrir slíkar aðvaranir hafa útköll aldrei verið fleiri vegna gróðurelda um áramótin, en samtals voru 84 útköll á innan við sólarhring á suðvesturhorni landsins. Ljóst er að mikið álag var á slökkviliðum um áramótin og mátti litlu muna að stórtjón hefði orðið en margir af þeim eldum sem kviknuðu voru rétt við hús og var mikið um brennur sem ekki var leyfi fyrir. „Við höfum ekki séð þennan fjölda útkalla áður á þessum tíma,“ er haft eftir Lárusi Kristni Guðmundssyni sem er settur varaslökkviliðsstjóri hjá Brunavörnum Árnessýslu. Svipaða sögu er að segja hér af Vesturlandi, en á síðasta ári var barist við gróðurelda á nokkrum stöðum í landshlutanum.\r\n\r\n<strong>Þörf á fleiri slökkviskjólum</strong>\r\n\r\nÁ vegum HMS er að störfum starfshópur um varnir gegn gróðureldum. Er hann skipaður fulltrúum frá Almannavarnadeild ríkislögreglustjóra, Félagi slökkviliðsstjóra, Húsnæðis- og mannvirkjastofnun, Landssambandi slökkviliðs- og sjúkraflutningamanna, Lögreglustjórafélagi Íslands, Sambandi íslenskra sveitarfélaga, Skipulagsstofnun, Skógræktinni, Veðurstofu Íslands og Verkís. Hópurinn hefur meðal annars það hlutverk að vinna að fyrirbyggjandi aðgerðum gegn gróðureldum. „Í ljósi atburða um áramótin áréttar starfshópurinn mikilvægi þess að stjórnvöld beiti sér fyrir því að tryggja slökkviliðum og Landhelgisgæslunni aðgengi að slökkviskjólum sem lykilbúnað til að takast á við gróðurelda hvar sem er á landinu. Í dag er einungis til ein slökkviskjóla sem keypt var frá Kanada í fyrra þegar eldri skjóla eyðilagðist við slökkvistörf í Heiðmörk síðastliðið vor og hefði því lítið mátt út af bregða til að illa færi. Að mati starfshópsins og miðað við fyrirliggjandi gögn um aukna gróðureldahættu hér á landi er nokkuð ljóst að efla þarf viðbúnað við gróðureldum með því að tryggja aðgengi að fleiri en einni slökkviskjólu svo viðbragsaðilar séu í stakk búnir að bregðast við gróðureldavánni,“ segir í tilkynningu.",
  "innerBlocks": []
}