Jón Gunnarsson og Sigríður Björk Guðjónsdóttir.

Starfshópur um forvarnir og vitundarvakningu gegn kynferðisbrotum

Jón Gunnarsson innanríkisráðherra hefur falið Sigríði Björk Guðjónsdóttur ríkislögreglustjóra að leiða starfshóp um forvarnir og vitundarvakningu gegn kynferðisbrotum og kynbundnu ofbeldi og áreiti. Aðrir í starfshópnum eru Guðfinnur Sigurvinsson verkefnastjóri, Hildur Sunna Pálmadóttir frá dómsmálaráðuneyti og Eygló Harðardóttir hjá embætti ríkislögreglustjóra. Skal hópurinn styðja við uppbyggingu á samstarfi lögreglu og samstarfsaðila gegn ofbeldi og afleiðingum þess, þar á meðal í formlegri þjónustu við þolendur kynferðisbrota. Starfshópurinn mun einnig standa fyrir almennri vitundarvakningu um kynbundið ofbeldi í samfélaginu.

Kærum til lögreglu vegna kynferðisbrota fjölgaði um 24% frá 2020 til 2021. Heimilisofbeldismál af hendi maka eða fyrrum maka síðustu tvö árin hafa aldrei verið fleiri samkvæmt málaskrá lögreglunnar, eða í kringum 750 bæði árin. Áhrifaríkustu aðferðirnar í baráttunni gegn kynbundnu ofbeldi eru virkar forvarnir, vitundarvakning og þróun á þverfaglegri samvinnu lögreglu við aðra lykilaðila. Lögð er áhersla á slíkt í hinum ýmsu aðgerðaáætlunum stjórnvalda gegn ofbeldi og í stjórnarsáttmála ríkisstjórnarinnar fyrir yfirstandandi kjörtímabil.

Í vinnu hópsins verður hugað sérstaklega að viðkvæmum hópum fólks sem reynslan hefur sýnt að eru í meiri hættu á að verða fyrir ofbeldi. Lagt er fyrir starfshópinn að gæta að samræmi við tillögur aðgerðaáætlana stjórnvalda í baráttunni gegn kynbundnu ofbeldi og skal starfshópurinn leggja áherslu á viðtækt samráð innan þess sviðs.

Líkar þetta

Fleiri fréttir