Akurey kom með fullfermi eða 195 tonn til Grundarfjarðar 28. nóvember. Þar af voru 155 tonn þorskur. Ljósm. þa.

Mokveiða stórþorsk á Dohrnbankanum

,,Íslenskir togaraskipstjórar höfðu lengi rætt um að kanna þetta svæði en það gerðist ekkert í málinu fyrr en Ásgeir á Björgvini EA lét á það reyna nú í aflatregðunni á heimamiðum. Árangurinn var ævintýralegur og ævintýrið virðist bara halda áfram. Við erum búnir að fara tvo túra og aflinn er samtals um 310 tonn.“ Þetta segir Eiríkur Jónsson, skipstjóri á ísfisktogara Brims; Akurey AK, sem kom til hafnar í Reykjavík í vikunni með 130 tonn. Uppistaða aflans var þorskur. Svæðið, sem Eiríkur ræðir þarna um er Dohrnbankinn sem er um 90 til 100 sjómílur vestur af Látrabjargi. Í túrnum á undan fengu Eiríkur og hans menn fullfermi og var þeim afla landað í Grundarfirði eftir tæpa þrjá sólarhringa á veiðum. Þar af var þorskur 155 tonn.

,,Við vorum alltaf vissir um að þarna væri fiskur en að magnið væri svona mikið og þorskurinn væri jafn stór og raun ber vitni, er eitthvað sem mig óraði ekki fyrir. Þetta var mikið sex til tíu kílóa þorskur. Við vorum að sjá fiska upp í 17-18 kíló að þyngd. Vélarnar í vinnslunni ráða vel við fisk upp í 12-13 kíló en stærsta fiskinn flokkuðum við frá og ég held að hann hafi farið í einhverja saltfiskvinnslu,“ segir Eiríkur en þessi óvænti mokafli af stórum og góðum þorski vekur upp gamlar vertíðarminningar. ,,Lifrin í þessum fiski er svakaleg. Ég held að ég hafi ekki séð svona fallega, hvíta lifur áður. Í þorskinum úr fyrri túrnum voru 12-15 tonn af lifur,“ sagði Eiríkur.

Eiríkur Jónsson skipstjóri.

Líkar þetta

Fleiri fréttir