Skagastúlkur voru sigursælar á Íslandsmeistaramótinu í klifri sem fram fór um liðna helgi í Klifurhúsinu í Reykjavík. Keppt var í grjótglímu (e. bouldering) en mótið var fjórða og síðasta mót Íslandsmeistaramótaraðarinnar fyrir árið 2021. Skagamenn voru fjölmennir en tólf klifrarar mættu til leiks fyrir ÍA.

Í C- flokki sigraði Þórkatla Þyrí Sturludóttir örugglega með því að toppa sjö af átta leiðum og tryggði sér þar með samanlagðan Íslandsmeistaratitil fyrir árið 2021. Þórkatla Þyrí bar sigur úr býtum á þremur af fjórum mótum ársins 2021 auk þess sem hún landaði silfurverðlaunum á Íslandsmeistaramótinu í línuklifri sem fram fór fyrir tveimur vikum á Smiðjuloftinu á Akranesi. Í öðru sæti í samanlögðu varð Ester Guðrún Sigurðardóttir með tvenn silfurverðlaun og ein bronsverðlaun og landaði hún því flottum silfurverðlaunum fyrir ÍA í samanlögðu á sínu fyrsta ári í keppni.

Í B-flokki hafnaði Sylvía Þórðardóttir í öðru sæti á móti helgarinnar og tryggði sér þar með annað sæti í samanlögðu, með ein gullverðlaun og tvenn silfurverðlaun að loknum fjórum mótum. Sylvía er nýkomin heim af Norðurlandamóti sem fram fór í Lillehammer í Noregi, þar sem landslið Íslands keppti við sterkustu klifrara Norðurlandanna í línuklifri. Þar hafnaði hún í þrettánda sæti af nítján sem er prýðilegur árangur á fyrsta línuklifurmóti og gefur góð fyrirheit um framhaldið.

Unnu til verðlauna á Íslandsmeistaramótinu í klifri