{
  "name": "core/freeform",
  "attributes": [],
  "saveContent": "Faxaflóahafnir héldu málþing með notendum sínum fimmtudaginn 21. október í salnum Björtuloftum í Hörpu. Tilgangur þingsins var að kynna það sem efst er á baugi hjá Faxaflóahöfnum og fræða notendur um starfseminga á hafnarsvæðum fyrirtækisins. Erna Kristjánsdóttur, markaðs- og gæðasjóri Faxaflóahafna stýrði fundi og fyrst á mælendaskrá var Þórdís Lóa Þórhallsdóttir, varastjórnarformaður Faxaflóahafna. Hún ræddi um áhrif heimsfaraldurs á rekstur Faxaflóahafna og sagði fyrirtækið hafa unnið varnarsigur í baráttunni við hann og sýnt jákvæða rekstrarniðurstöðu. Hún greindi frá því að allan tímann sem faraldurinn hefur staðið yfir hefur ekki komið upp eitt einasta covid tilvik meðal starfsmanna.\r\n\r\nMikil aukning hefur orðið í skipakomum í ár, mun meira en Faxaflóahafnir áttu von á sagði Þórdís Lóa og færði hún jafnframt starfsfólki þakkir fyrir vel unnin störf í erfiðar kringumstæður. Þórdís Lóa fór yfir hin ýmsu verkefni Faxaflóahafna sem eru í vinnslu, hafa klárast og eru að hefjast. Faxaflóahafnir eru að flytjast úr Hafnarhúsinu á komandi árum sem verður heimili safns Nínu Tryggvadóttur auk þess sem húsið verður áfram miðstöð myndlistar og menningar. Hún minntist á endurgerð söluhúsanna sem tilnefnd hafa verið til Hönnunarverðlauna Íslands. Þá nefndi hún einnig endurheimt votlendist á Katanesi við Grundartanga.\r\n\r\nLangstærsta verkefni Faxafláhafna segir Þórdís Lóa vera landtengingu flutningaskipa við Sundahöfn sem er samstarfsverkefni Faxaflóahafna, Eimskip, Samskipa, Veitna og umhverfis- og auðlindaráðuneytisins sem mun draga verulega úr mengun á höfuðborgarsvæðinu.\r\n\r\n<strong>Uppbygging hafnsækinnar ferðaþjónustu á Akranesi</strong>\r\n\r\nÞá kom Þórdís Lóa inn á áhugaverð verkefni á Akranesi og á Grundartanga. Hún nefndi lengingu hafnargarðsins á Akranesi auk tengingar nýs miðbæjar við hafnarsvæðið sem er til þess fallin að tryggja góða, nútímalega og umhverfisvæna uppbyggingu. Þórdís Lóa segist sjá fyrir sér samvinnuverkefni milli Faxaflóahafna og Akraneskaupstaðar þar sem höfnin verður betur tengd við samfélagið og stuðlað verður að uppbyggingu á hafnsækinni ferðaþjónustu og atvinnulífi.\r\n\r\n[caption id=\"attachment_48353\" align=\"alignleft\" width=\"200\"]<img class=\"wp-image-48353 \" src=\"https://skessuhorn.is/wp-content/uploads/2021/10/Malthing-Faxafloahafna-i-Horpu_1-600x400.jpg\" alt=\"\" width=\"200\" height=\"134\" /> Grundartangahöfn er hluti af Faxaflóahöfnum. Ljósm. úr safni.[/caption]\r\n\r\nÁ Grundartanga sagði Þórdís að væri gríðarmikið að gerast. Þar hefur Þróunarfélag Grundartanga unnið frábæra undirbúningsvinnu við að þróa áfram hugmyndir að grænum iðngarði og hringrásargarði. Þá vinna Faxaflóahafnir að viðskiptaþróun fyrir svæðið og segir Þórdís Lóa að mikill áhugi sé á framleiðslu rafeldsneytis. Hún benti á að á Grundartanga væru tvö stóriðjufyrirtæki sem losuðu samtals um milljón tonn af koltvísýringi á ári. Ef hægt væri að binda bara hluta þess með að framleiða rafeldsneyti á svæðinu gæti þróast þarna merkilegt grænt iðnaðarsvæði. Ein af forsendum slíks verkefnis sagði Þórdís Lóa vera aðgengi að áfyllingarhöfn en á staðnum er góð höfn. Þetta er afar spennandi þróun og Faxaflóahafnir munu vinna áfram með Þróunarfélagi Grundartanga og öðrum eigendum þess að uppbyggingu á Grundartanga.\r\n\r\n<strong>Samdráttur í lönduðum afla</strong>\r\n\r\nNæstur á mælendaskrá var Magnús Þór Ásmundsson hafnarstjóri. Hann fjallaði um áherslur og skipulag Faxaflóahafna auk þess sem hann kynnti ýmsa tölfræði úr rekstri fyrirtækisins. Magnús Þór sagði frá vinnu við eigendastefnu Faxaflóahafna, meðal annars góðum fundi sem haldinn var á Breiðinni á Akranesi. Hann fjallaði um mikilvægi hafnarinnar og að hún væri í raun hjartað í „lógistík“ fyrir atvinnulífið. Hann sagði Faxaflóahafnir vilja vera í forystuhlutverki um þróun hafna að styðja rannsóknir og þróun auk þess að vera að vinna í orkuskiptum á sjó. Magnús Þór sagðist telja að Faxaflóahafnir vera mikilvægar í því að viðhalda og auka samkeppnishæfni landsins með góðum hafnarinnviðum og skilvirkum lausnum.\r\n\r\nMagnús Þór fjallaði um nýtt skipulag Faxaflóahafna sem kynnt var á þessu ári. Tilgangurinn með hinu nýja skipulagi væri ekki að gera byltingu heldur að skýra starfsemina, skerpa sýn á tekjustrauma fyrirtækisins, auka viðskiptahugsun og þróun í fyrirtækinu, skýra ábyrgð og skerpa áherslu á öryggi, umhverfi og mannauð.\r\n\r\nÞví næst fjallaði Magnús Þór um tölfræði varðandi skipakomur. Þar sjást skýr merki um covid en skipakomum fækkaði mikið árið 2020. Skipakomum hefur hins vegar farið mjög fjölgandi á þessu ári. Þá sagði hann frá því að skip sem kæmu séu almennt að stækka. Einnig lýsti hann ánægju með að milli- og framhaldsflutningar þar sem Sundahöfn er umskipunarhöfn hafa aukist verulega og nefndi hann siglingar til Grænlands sérstaklega í þessu sambandi. Þá fjallaði Magnús Þór um landaðan afla í höfnum Faxaflóahafna en þar hefur orðið verulegur samdráttur.\r\n\r\n<strong>Nánast allar farþegaskipakomur farþegaskipti</strong>\r\n\r\nMagnús fjallaði um aukinn áhugi slíkra útgerða á ferðum til Íslands og sagði að aukningin væri mikil í ferðum þar sem farþegar fljúga til Íslands, fara um borð í skip og taka hringsiglingu um Íslands eða til Grænlands. Þetta segir Magnús Þór vera verðmæta farþega, í raun verðmætari en þeir sem koma með stóru farþegaskipunum, því þeir staldra lengur við, þeir taka gistinætur, fara á veitingastaði og svo framvegis. Fimm slíkar skipakomur voru til dæmis til Akraness í sumar. Nánast allar farþegaskipakomur í sumar voru að sögn Magnúsar Þórs slík farþegaskipti. Af 190 skipakomum sem bókaðar hafa verið á næsta ári eru 98 vegna farþegaskipta.\r\n\r\nHvað varðar næstu framtíð segir Magnús Þór að framundan séu mikil fjárfestingaár. Tæknin breytist hratt og til þess að fylgja þróuninni þurfi Faxaflóahafnir að vera á tánum. Samkvæmt þróunaráætlun næstu ára mun 1,9 milljörðum verða varið í fjárfestingarverkefni á næsta ári, 3 milljörðum árið 2023, 3,5 milljörðum árið 2024 og 3 milljörðum árið 2025. Meðal stórra fjárfestingarverkefna eru orkuskipti Faxaflóahafna, landtengingar og fleira. Einnig fjallaði hann um mögulega vetnisframleiðslu á Grundartanga.\r\n\r\n<strong>Sparnaður ef Faxaflóahafnir verða snjallhöfn</strong>\r\n\r\nYngvi Björnsson, prófessor og sérfræðingur í gervigreind við Háskólann í Reykjavík, tók næstur til máls. Í erindi sínu fjallaði hann um fjórðu iðnbyltinguna og möguleg áhrif hennar á hafnir og sjávarútveg. Hann fjallaði um þátt nets hlutanna og gervigreind í fjórðu iðnbyltingunni. Hann útskýrði hvernig þessir þættir geta hjálpað til við öflun rauntímaupplýsinga sem hafa upplýsingar á alla ákvarðanatöku auk þess að gera kleift að auka sjálfvirknivæðingu sem leiðir til betri og aukinnar þjónustu. Yngvi útskýrði hvernig hlutir læra að skynja umhverfið, læra af reynslunni og taka sjálfstæðar ákvarðanir byggðar á því.\r\n\r\nHvað varðar umferð í höfnum fjallaði Yngvi um sjálfvirknivæðingu og sjálfsiglandi skip og að Norðurlöndin séu framarlega á þessu sviði. Jafnframt fjallaði hann um hvernig hafnir geta orðið snjallhafnir, smart-ports. Hann benti líka á að mikill kostnaður getur sparast fyrir Faxaflóahafnir að verða snjallhöfn.\r\n\r\n<strong>Hús Sjávarklasans líktist oft meira flugvelli</strong>\r\n\r\nNanna Ósk Jónsdóttir, rekstrarstjóri Húss sjávarklasans, tók næst við boltanum og sagði frá Íslenska sjávarklasanum, starfseminni, samstarfi á alþjóðavettvangi og Sjávarakademíunni. Upphafið að Húsi sjávarklasans sagði Nanna Ósk vera hugmynd dr. Þórs Sigfússonar og var rannsóknarverkefni hans við Háskóla Íslands. Fyrirmyndin er fengin hjá Google þar sem aðferðafræðin byggir á því að deila upplýsingum.\r\n\r\nÍ húsinu eru 38 skrifstofur og átta fundaherbergi. Þar blandast saman fjölbreyttir frumkvöðlar og starfsmenn í húsinu eru um 120 talsins. Nanna fjallaði um mikilvægi þess fyrir frumkvöðla í bláa hagkerfinu að hafa svona gott húsnæði þar sem fegurð hafsins er allt um lykjandi. Haldið er fast í gildi samvinnu í Húsi Sjávarklasans.\r\n\r\nNanna fjallaði um hversu fjölbreytt starfsemin er í húsinu og sagði frá því hvernig hlutverk kvenna hefur breyst frá því að vera nær eingöngu í framleiðslu sjávarafurða yfir í að vera í forystu- og lykilhlutverki í frumkvöðlafyrirtækjunum. Fyrirtækin eru til að mynda í heilsu- og snyrtivörum auk margs annars. Þá nefndi Nanna að Íslendingar eru að nýta um 80% sjávaraflans á meðan aðrar þjóðir eru að nýta um 50% aflans.\r\n\r\nÞessu næst sagði Nanna Ósk frá Sjávarakademíunni sem hefur notið gríðarlegra vinsælda og komu um eitthundrað umsóknir um inngöngu í ár. Í Sjávarakademíunni fær ungt fólk haldbæra reynslu og menntun í bæði markaðsfræði, hvernig eigi að stofna fyrirtæki, hvernig eigi að fjármagna fyrirtækin auk þess að fá mikinn stuðning frá frumkvöðlaumhverfinu innan Sjávarklasans. Í lok námsins vinna nemendur síðan viðskiptaáætlun sem þeir þurfa síðan að kynna fyrir fjárfestum.\r\n\r\nHús Sjávarklasans hefur að sögn Nönnu hlotið mikla athygli, bæði frá fjölmiðlum og erlendis frá og reglulega koma gestir erlendis frá. Margir blaðamenn koma frá stærstu fréttamiðlum heims og sagði Nanna að Hús Sjávarklasans líktist oft meira flugvelli en hefðbundinni skrifstofubyggingu. Jafnframt sagði hún að mikill fjöldi sjávarklasa víða um heim hefur verið stofnaður að íslenskri fyrirmynd. Til marks um þetta sagði hún frá sjávarklasahúsi í Maine í Bandaríkjunum sem hlaut nafnið „The Hús.“\r\n\r\nSíðastur á mælendaskrá var svo Þorsteinn Svanur Jónsson, framkvæmdastjóri vöruþróunar hjá fyrirtækinu Klöppum og fjallaði hann um starfrænt vistkerfi sem er tækninýjung fyrir sjávarútveginn. Hann sagði frá hugbúnaði sem fyrirtæki hans býður upp á sem hjálpar fyrirtækjum að halda utan um kolefnisspor sín. Hugbúnaðurinn tengir saman fyrirtæki og hjálpa fyrirtækjunum að draga saman kolefnissporið úr allri virðiskeðjunni.",
  "innerBlocks": []
}