Ljósm. UMFÍ

Margir nemendur af Vesturlandi sendir heim úr Ungmennabúðum

Smit kom upp í hópi nemenda sem voru í Ungmennabúðum UMFÍ á Laugarvatni í vikunni. Þar komu saman á mánudaginn margir nemendur í níunda bekk úr grunnskólum af Vesturlandi en í gærkvöldi fékkst staðfest Covid-19 smit í hópnum. Voru foreldrar og skólastjórnendur strax upplýstir um málið. Í kjölfarið var ákveðið, í samráði við Almannavarnir og yfirvöld, að best væri að senda sjötíu nemendur heim í gærkvöldi. Að óbreyttu hefðu þau farið heim um hádegi í dag. Nemendurnir fara því í sóttkví fram í næstu viku ásamt í einhverjum tilfellum foreldri eða forráðamanni.

„Okkur þykir alveg ótrúlega leiðinlegt að smit hafi komið upp í búðunum. Það var búið að vera svo gaman hjá nemendunum í vikunni og þeim liðið alveg frábærlega vel á Laugarvatni. Engum er um að kenna að svona fór. Við erum búin undir aðstæður eins og þessar og vitum að þær geta áfram komið upp í samfélaginu,‟ segir Sigurður Guðmundsson, forstöðumaður Ungmennabúða, í tilkynningu. „Fyrst og fremst er þetta afar leiðinlegt fyrir smitaða nemandann. Ég vona að hann finni ekki mikið fyrir áhrifum smitsins. Við munum að sjálfsögðu halda áfram að gæta að sóttvörnum okkar og hreinlæti eins og við gerum alltaf,‟ segir Sigurður. Nú er unnið að ítarlegri sótthreinsun á húsnæði ungmennabúðanna og starfsfólk fer í kjölfarið í smitgát og PCR-próf.

Líkar þetta

Fleiri fréttir