Meðfylgjandi mynd var tekin þegar styrknum var veitt viðtaka. Ljósm. Landsbjörg.

Enskar frímúrarastúkur styrkja nýsmíði björgunarskipa

Ensku frímúrarastúkurnar United Lodge of Prudence No 83 og Belgrave Chapter No 121 ákváðu nýverið að styrkja nýsmíðasjóð björgunarskipa Landsbjargar um 2000 pund. Var styrkur þessi veittur í tengslum við heimsókn íslenskra frímúrara á fundi áðurnefndra stúka.

Slysavarnafélagið Landsbjörg er í viðamikilli framkvæmd með endurnýjun allra 13 björgunarskipa sinna á næstu tíu árum. Núverandi skip félagsins eru komin vel til ára sinna þar sem meðalaldur þeirra er rúm 35 ár. Skipin voru á sínum tíma keypt á gjafverði af Konunglegu bresku sjóbjörgunarsamtökunum (The Royal National Lifeboat Institution) og er það því táknrænt að fyrstu styrkir sem berast í nýsmíðasjóð björgunarskipanna skuli koma frá Bretlandi.

Smíðin hefst í nóvember

Búið er að semja um smíði á fyrstu þremur björgunarskipunum sem smíðuð verða í Finnlandi og afhent 2022 og 2023. Hvert skip kostar 285 milljónir en Ríkissjóður mun greiða helming þess kostnaðar. Safnað hefur verið í nýsmíðasjóð björgunarskipa í langan tíma en nú er smíðin að hefjast og því komið að fyrstu greiðslum. Því eru styrkir sem þessir kærkomnir fyrir verkefnið, segir í tilkynningu Landsbjargar.

„Sérstaklega löng og ríkuleg hefð er fyrir styrkjum samtaka eins og frímúrara til reksturs og útgerðar björgunarskipa í Bretlandi og er því allnokkur heiður fyrir Slyasvarnafélagið Landsbjörg að þessar tvær stúkur skuli hafa tekið ákvörðun um að styðja þetta verðuga verkefni félagsins sem er ætlað til að auka öryggi sjófarenda og annarra við Ísland til muna. Slysavarnafélagið Landsbjörg vill koma sérstöku þakklæti á framfæri til þeirra íslensku frímúrara sem komu að þessari ákvörðun ásamt þakklæti til meðlima United Lodge of Prudence og Belgrave Chapter,“ segir í tilkynningu.

Líkar þetta

Fleiri fréttir