Hér er yfirkjörstjórn NV kjördæmis að bera saman bækur sínar áður en niðurstaða endurtalningar var send til landsyfirkjörstjórnar síðdegis í gær. Ljósm. mm

Kosningarnar í Norðvesturkjördæmi verða kærðar

Magnús Davíð Norðdahl oddviti Pírata í Norðvesturkjördæmi hefur ákveðið að kæra kosningarnar í Norðvesturkjördæmi til kjörbréfanefndar Alþingis og fara fram á svokallaða uppkosningu sem felur í sér að kosið yrði að nýju í Norðvesturkjördæmi. „Kæran verður lögð fram formlega á næstu dögum. Eftir atvikum verður kæra einnig send til lögreglu,“ segir Magnús. Hann segir að ljóst sé að alvarlegir ágallar voru á talningu atkvæða í Norðvesturkjördæmi. Þá hefur komið fram í fjölmiðlum að Karl Gauti Hjaltason fv. þingmaður Miðflokksins hyggist kæra til lögreglu framkvæmd talningar í NV kjördæmi. Nokkrir flokkar hafa farið fram á endurtalningu atkvæða í Suðurkjördæmi.

„Kjörgögn voru ekki innsigluð eftir lok talningar snemma morguns 26. september heldur skilin eftir á Hótel Borgarnesi í sal hótelsins þegar talningafólk fór heim. Varsla og eftirlit á þeim tíma, sem leið frá lokum talningar og fram að endurtalningu, þegar starfsfólk mætti aftur liggur ekki fyrir með fullnægjandi hætti. Hótelið var opið og þar mátti sjá gesti þegar endurtalning fór fram. Hafi salnum verið læst var hann ekki innsiglaður og þá liggur ekki fyrir hver eða hverjir höfðu lykla að umræddum sal,“ segir Magnús Norðdahl.

Það segir Magnús að endurtalning hafi hafist án þess að umboðsmönnum lista Pírata í Norðvesturkjördæmi væri gert viðvart. Formaður kjörstjórnar varð síðan ekki við kröfu umboðsmanna að bíða með endurtalningu þar til umboðsmenn kæmu á staðinn. „Framangreind atriði, hvert um sig og eins öll saman, eru að mati oddvita Pírata háalvarleg og til þess falin að draga úr trúverðugleika talningarinnar, sama hvort litið er til fyrri eða síðari talningarinnar, starfa yfirkjörstjórnar í heild og þar með trúverðugleika kosninganna sem fram fóru í kjördæminu. Ljóst er að breyting varð á fjölda ógildra og auðra seðla á milli fyrri og síðari talningar og sama á við um atkvæðafjölda einstakra framboða. Svona vinnubrögð í lýðræðislegu ferli kosninga og talningar eru algjörlega óásættanleg. Eina leiðin til að leysa úr þessu er að endurtaka kosningarnar í Norðvesturkjördæmi og tryggja gagnsæi og að farið sé eftir lögum og reglum. Það er sanngjörn og réttmæt krafa okkar frambjóðenda og ekki síst kjósenda í kjördæminu,“ segir Magnús Norðdahl.

Líkar þetta

Fleiri fréttir