Úthlutað úr Matvælasjóði

Kristján Þór Júlíusson, sjávarútvegs- og landbúnaðarráðherra, hefur úthlutað rúmum 566 milljónum króna úr Matvælasjóði og renna styrkirnir til 64 verkefna. Hlutverk sjóðsins er að styrkja þróun og nýsköpun við framleiðslu og vinnslu matvæla úr landbúnaðar- og sjávarafurðum. Þetta er í annað sinn sem úthlutað er úr Matvælasjóði.

Veittir voru styrkir úr fjórum sjóðum á vegum Matvælasjóðs. Þeir eru Bára sem styrkir verkefni á hugmyndastigi, Kelda sem styrkir rannsóknaverkefni sem miða að því að skapa nýja þekkingu, Afurð sem styrkir verkefni sem komin eru af hugmyndastigi en ekki tilbúin til markaðssetningar og Fjársjóður sem styrkir markaðsátak en einnig uppbyggingu innviða fyrirtækisins sem tengjast sókn á markaði.

Alls bárust 273 umsóknir í þessa fjóra styrkjaflokka, alls um tæplega 3,7 milljarða króna. Alls hlutu 640 verkefni styrki upp á alls 566,6 milljónir króna. Hæsta styrkinn hlaut verkefnið „Hrein fiskiolía í vesturvíking“ á vegum fyrirtækisins True Westfjords ehf., kr. 25,5 milljónir króna en fyrirtækið er skráð til heimilis í Bolungarvík.

Verkefni á Vesturlandi hlutu alls 9% veittra styrkja eða um 51 milljón króna. Hæsta styrkinn á Vesturlandi hlaut Landbúnaðarháskóli Íslands í samstarfi við einkaaðila til verkefnanna „Mannakorn – hafrar og hámörkun gæða“ og „Mannakorn – Betra bygg með bættum aðferðum,“ alls 32 milljónir króna. Þá hlaut Matís ohf. Í samstarfi við einkaaðila styrki í verkefnin „Súrþang og góðgerlar í fiskeldi“ og „Áskoranir við pökkun grænmetis“ rúmar 26 milljónir króna.

Meðal annarra verkefna á Vesturlandi sem hlutu styrki má nefna Svæðisgarðinn Snæfellsnesi í verkefnið „Markaðssetning ábyrgra matvæla frá Snæfellsnesi“ sem hlaut tæpar 11 milljónir króna, Ábót íslensk fæðubót ehf. hlaut þrjár milljónir króna í verkefnið „Útfærsla hugmyndar og prófun á fæðubótarefni úr tilteknum spírum og sykrum úr þörungum,“ og Eirný Ósk Sigurðardóttir sem hlaut þrjár milljónir í verkefnið „Ráðgjöf í nýsköpun mjólkurafurða – fýsileikaathugun og viðskiptaáætlun.“

Líkar þetta

Fleiri fréttir