ÍA lék gegn Haukum í síðustu umferð Lengjudeildar kvenna í knattspyrnu í gærkvöldi en fyrir leik átti ÍA möguleika á að bjarga sér frá falli. Með sigri gegn Haukum og að annað hvort Grótta eða HK myndu misstíga sig hefði ÍA haldið sæti sínu í deildinni. Bæði Grótta og HK töpuðu sínum leikjum á heimavelli í gær en því miður náði ÍA ekki sigri gegn Haukum og því féll ÍA og leikur í 2. deild næsta sumar.

Leikmenn ÍA virtust ekki alveg vera tilbúnar í byrjun í þessum mikilvæga leik í gær því Haukar voru komnir yfir 2-0 eftir 20 mínútur með mörkum frá Hildi Karítas Gunnarsdóttur og Rakel Leósdóttur. Mikaela Nótt Pétursdóttir bætti svo við þriðja markinu fyrir Hauka fimm mínútum fyrir leikhlé og staðan orðin ansi svört fyrir ÍA þegar liðin gengu til búningsklefa í hálfleik.

Þjálfari ÍA, Aron Ýmir Pétursson, gerði tvær skiptingar í hálfleik og það virtist hleypa fjöri í leikmenn ÍA. Unnur Ýr Haraldsdóttir minnkaði muninn á 69. mínútu og tíu mínútum síðar var hún aftur á ferðinni og allt í einu ýjaði ÍA að því að eiga möguleika á að bjarga sér frá falli. Tíminn var hins vegar naumur og þó Anna Þóra Hannesdóttir hafi jafnað leikinn fyrir ÍA á þriðju mínútu í uppbótatíma var það ekki nóg til að sleppa við fall.

Ef horft er til baka í sumar og skoðuð töpuð stig að þá er hægt að benda á leik ÍA og KR þar sem KR skoraði jöfnunarmarkið á síðustu sekúndu leiksins og þar missti ÍA tvö stig sem hefði annars haldið þeim uppi. Þá má einnig nefna heimaleikinn við HK þar sem þær voru einum fleiri allan síðari hálfleikinn og töpuðu 1-2 en svona er þetta stundum. KR og Afturelding tryggðu sér sæti í Pepsi Max deild kvenna næsta sumar en lið Gróttu féll með ÍA og þeirra sæti taka lið Fjarðabyggðar/Hattar/Leiknis og Völsungs.

ÍA féll í 2. deild eftir jafntefli við Hauka