Vesturlandslið Skallagríms og Snæfells í meistaraflokki kvenna í körfubolta gáfu bæði leiki sína í 16-liða úrslitum VÍS bikarsins sem áttu að fara fram á mánudagskvöldið. Skallagrímur átti að spila gegn Val og Snæfell gegn Keflavík. Helsta ástæðan er sögð mannekla.

Lára Magnúsdóttir, sem sæti á í stjórn Skallagríms, segir að aðalástæðan hafi einfaldlega verið sú að þær voru ekki tilbúnar með fullskipað lið og það hafi í raun ekki verið flóknara en það. Um þessar mundir eru um 14 stelpur að æfa hjá meistaraflokki Skallagríms en Lára segir að þar eru sjö stelpur að koma upp úr yngri flokkunum, þrír leikmenn sem komu um helgina og erlendu leikmennirnir ekki væntanlegir fyrr en í næstu viku vonandi. „Þessar ungu stelpur eru að stíga sín fyrstu skref í meistaraflokki og okkur fannst ekki rétt að senda þær einar í leik á móti úrvalsdeildarliði. En við verðum klárar í deildina fyrir fyrsta leik í október og erum mjög spennt fyrir komandi tímabili.“

Baldur Þorleifsson, þjálfari Snæfells, segir ástæðuna hjá þeim vera þá að Snæfell hafi ekki verið búið að ná saman liðinu fyrir fyrsta leik en nú sé verið að búa til nýtt lið með ungum heimastúlkum og tveimur útlendingum og þá mun félagið hugsanlega fá tvær á venslasamning. „Miklar breytingar hafa orðið á liðinu frá síðasta tímabili, gamli leikmannakjarninn er nánast allur hættur og við erum að setja af stað þriggja ára áætlun með það markmið að koma upp samkeppnishæfu liði í efstu deild að nýju,“ segir Baldur.

Tímabilið hjá liðunum hefst í byrjun október. Skallagrímur sækir Keflavík heim í úrvalsdeild kvenna miðvikudaginn 6. október og Snæfell fer í Vesturbæinn 2. október og leikur gegn liði KR í 1. deild kvenna.

Skallagrímur og Snæfell gáfu leikina í VÍS bikarnum