„Þetta er fallegt veiðisvæði hérna í Straumunum. Við höfum aðeins orðið varir við fiska, sáum lax stökkva hérna áðan,“ sagði Þór Hauksson sem var við veiðar á svæðinu um helgina. Nú hafa veiðst 127 laxar í Straumunum í sumar og eru tíu af þeim hnúðlaxar. En silungsveiðin hefur verið góð og hafa veiðst um 340 silungar og sjóbirtingar sjást einnig stökkva. „Já, ég fékk tvo góða kippi áðan, sjóbirtingar líklega,“ sagði Ingvar J. Bender sem var við veiðar aðeins ofar á svæðinu og fékk hann einn sjóbirting.

Svæðið er fallegt og skemmtilegir veiðistaðir en það er kannski ekki alveg göngutíminn á fiski þessa dagana nema þá helst sjóbirtingurinn sem er á ferðinni. Þó veiddust lúsugir laxar í fyrradag. Ýmsar flugur hafa gefið vel í sumar, eins og Kolskeggur, Rauð Frances og Collie Dog. Margir hafa veitt vel á svæðinu í sumar eins og veiðifélagið Óðflugur sem fékk ellefu laxa fyrr í sumar en konurnar hafa veitt þarna til fjölda ára.

Bestu staðirnir í Straumunum eru Strenghorn og Straumaklöpp, núna undir það síðasta mátt veiða á spún og notfærðu einhverjir sér það.

Kíkjum aðeins á árnar í kring. Brennan hefur gefið 103 laxa, Skuggi 80 laxa, Gljúfurá hefur gefið 155 laxa, Norðurá 1300 laxa, Þverá 1200 laxa og Flókadalsá 210 laxa. Nú er sumarið að styttast en enn þá er víða veitt. Það hefur rignt að undanförnu og það hefur hleypt lífi í veiðisumarið undir lokin.

Straumarnir hafa gefið 127 laxa