Staða kvennaliðs ÍA versnaði enn eftir 0:3 tap gegn Aftureldingu á Akranesvelli á laugardag. Aðstæður til knattspyrnuiðkunnar voru ekki upp á það besta á laugardaginn. Strekkingsvindur sem stóð á annað markið. Gestirnir úr Aftureldingu léku undan vindi í fyrri hálfleik. Eftir aðeins 40 sekúndna leik fengu þær aukaspyrnu utan vítateigs Skagakvenna. Ragna Guðrún Guðmundsdóttir tók spyrnuna. Skotið fór undan vindinum á mitt markið og datt inn undir þerslána og inn. Erfitt fyrir Anítu Ólafsdóttur markvörð við að eiga. Með vindinn í bakið sóttu gestirnir mun meira en Skagastúlkur vörðust vel og börðust um hvern bolta og héldu leikmönnum Aftureldingar alveg í skefjum sem náðu ekki að skapa sér afgerandi marktækifæri í hálfleiknum fyrir utan markið. Staðan í hálfleik 0:1.

Með vindinn í bakið í síðari hálfleik reyndu Skagastúlkur að ógna marki Aftureldingar og komust næst því að jafna þegar Sigrún Eva Sigurðardóttir átti flott skot fyrir utan vítateig eftir að hafa leikið á tvo varnarmenn Aftureldingar, en skotið lenti ofan á þverslánni og aftur fyrir markið.

En Afturelding átti sínar skyndisóknir og á 79. mínútu leiksins náðu þær einni slíkri þegar Ragna Guðrún Guðmundsdóttir komst upp að endamörkum og sendi fyrir markið og þar náði Jade Arianna Gentile að skora af stuttu færi þvert gegn gangi leiksins. Við þetta misstu heimakonur aðeins móðinn og Guðrún Elísabet Björgvinsdóttir skoraði þriðja markið í uppbótatíma er hún komst ein inn fyrir og skoraði fram hjá Anítu í markinu og öruggur sigur í höfn.

Miðað við gang leiksins var sigur gestanna helst til of stór. Skagakonur börðust vel og lögðu allt í leikinn en það gekk ekki upp að þessu sinni. Það sem helst háði liðinu í þessum leik var hversu erfiðlega liðinu gekk að skapa sér marktækifæri. Það þarf víst að skora mörk til þess að vinna leiki.

Eins og áður sagði er liðið nú alveg á brúninni með að falla úr Lengjudeildinni þegar ein umferð er eftir. En enn er von. ÍA er nú í neðsta sæti með 14 stig, en HK og Grótta eru þar fyrir ofan með 16 stig. Ef ÍA nær að sigra Hauka í Hafnarfirði næstkomandi fimmtudag og HK eða Grótta misstíga sig þá gætu þær bjargað sér frá falli. HK á heimaleik gegn Augnabliki og Grótta á KR á heimavelli.

Staðan orðin erfið hjá Skagakonum