Út er komin skýrsla um aukið samstarf safna á Vesturlandi. Skýrslan er unnin af ráðgjafafyrirtækinu Creatrix undir stjórn Signýjar Óskarsdóttur og Emmu Bjargar Eyjólfsdóttur, en hún var unnin í samstarfi við Sigurstein Sigurðsson menningarfulltrúa hjá Samtökum sveitarfélaga á Vesturlandi. SSV var falið af mennta- menningarmálaráðuneytinu að kanna fýsileika á auknu samstarfi eða sameiningu safna á Vesturlandi í samráði við höfuðsafn og viðurkennt safn með vísan til safnalaga.

Skýrslan byggir að hluta til á gögnum sem safnað var 2019 en þá voru tekin viðtöl við forstöðumenn safna í eigu sveitarfélaga á Vesturlandi og við safnverði og starfsfólk safna. Einnig byggir skýrslan á hugmyndum sem komu fram í samtali safnafólks á ráðstefnu um safnamál vorið 2020 sem skipulagt var af SSV. Ráðstefnan fór fram rafrænt á tímum heimsfaraldar. Á málþinginu voru einnig innlegg frá sérfræðingum og öðru safnafólki á landinu.

Hugmyndir og viðhorf viðmælenda voru dregnar saman í tillögur til framkvæmda og þær kynntar fagaðilum í safnastarfi á Vesturlandi á rafrænum fundi. Hugmyndir voru kynntar og umræður um þær fóru fram á meðal safnafólks og fulltrúa sveitarfélaga sem voru á málþinginu. Í kjölfar málþingsins var skýrslan uppfærð í takt við góðar ábendingar sem komu bæði skriflega og munnlega inn á málþingið.

Undir lok júnímánaðar birtust tvær skýrslur á vef Mennta- og menningarmálaráðuneytisins sem fjalla um skýrslu um varðveislu og aðgengi að menningararfinum annars vegar og um stefnumörkum um safnastarf hins vegar. Í báðum stefnunum er fjallað um mikilvægi samstarfs bæði á milli safna innbyrðis og á milli stjórnvalda og safnanna. Áhersla er lögð á eflingu innviða sem eiga að stuðla að faglegu safnastarfi, til dæmis í formi öruggs húsnæðis til varðveislu muna. „Ljóst er að hugmyndir safnafólks á Vesturlandi ríma vel við stefnu stjórnvalda um öflugt og faglegt safnastarf til framtíðar. Auk þess að staðfesta að söfn á Vesturlandi eru nú þegar í samstarfi þá liggja fyrir hugmyndir um að efla það samstarf með stofnun klasa safna og sýninga á Vesturlandi, þar sem sýningar, setur og önnur safnatengd starfsemi, sem ekki fellur undir safnalög, hafi jafnframt aðgang að vettvanginum. Einnig er lagt til að sveitarfélög á Vesturlandi hefji formlegt samtal um meiri samvinnu varðandi minjavörslu í landshlutanum sem og framtíð rafrænnar skjalavistunar,“ segir í tilkynningu frá Sigursteini Sigurðssyni menningarfulltrúa SSV.

Skýrsla um samstarf safna á Vesturlandi