Dragnótarbátar frá Snæfellsbæ byrjuðu nýtt kvótaár með stæl. Til dæmis fékk Guðmundur Jensson SH 28 tonn á fyrsta veiðidegi og þar af voru 24 tonn þorskur en auk þess skarkoli. Gunnar Bjarnason SH var með 17 tonn og þar af átta tonn af þorski og 2,5 tonn af ýsu. Ólafur Bjarnason SH var með 18 tonn; sex tonn af þorski og 9,6 tonn af skarkola. Magnús Jónasson skipstjóri á Ólafi Bjarnasyni segir að mjög gott verð fáist fyrir skarkolann. Fékk hann 400 krónur fyrir kílóið á miðvikudaginn. „Ég held að þetta góða verð fyrir kolann komi til að vera,“ segir hann. Loks komu dragnótarbátar í Rifi að landi með góðan afla og var uppistaðan hjá þeim þorskur ásamt skarkola. Magnús SH var með 24 tonn eftir daginn og þar af voru 17 tonn þorskur.

Gott verð í upphafi vertíðar

Aron Baldursson, framkvæmdastjóri Fiskmarkaðs Íslands, sagðist í samtali við Skessuhorn, vera sáttur við þessa góðu byrjun og átti hann von á að komandi vertíð yrði góð þrátt fyrir 13% kvótaskerðingu. „Það er gott fiskverð eins og er og mikil eftirspurn eftir fiski. Yfirleitt er mjög gott verð á haustin, en ég á von á því að verð haldist gott í framhaldinu einnig þótt það sé erfitt að spá fyrir um það,“ segir Aron. Meðalverð á þorski 1. september var 514 krónur fyrir kílóið, sem er dágott, en verð á þorski yfir 8 kíló var tæpar 612 krónur. Verð á skarkola var um 401 króna.

Skarkolinn héðan er betri

Sveinn Ingi Ragnarsson, framkvæmdastjóri Elite Seafood, sem flytur mikið út af skarkola, segir að það sé mikil eftirspurn eftir skarkola bæði í Englandi og Hollandi um þessar mundir og verð sé hátt. Sveinn segir það gæðum íslenska skarkolans að þakka að menn sækjast eftir fiski héðan. Hér séu mun meiri gæði en í danska og hollenska kolanum. „Verð kemur til með að vera í hærri kantinum í haust og á ég alls ekki von á því að það fari niður fyrir 250 krónur þegar fram líða stundir. Megnið af skarkola sem við kaupum á fiskmörkuðum fer á Englandsmarkað og eru það mest fastir viðskiptavinir sem kaupa af okkur. Það er jöfn og mikil eftirspurn eftir fiski frá Íslandi,“ segir Sveinn að lokum.

Dragnótarbátar byrja nýtt kvótaár vel