Skólastarf er komið á fullan skrið í Fjölbrautaskóla Vesturlands á Akranesi. Að sögn Steinunnar Ingu Óttarsdóttur skómameistara eru alls um 550 nemendur í skólanum í haust, í dagskóla og dreif- og helgarnámi. „Sjötíu starfsmenn eru við skólann í mismunandi starfshlutfalli og verkefnin eru næg. Nýlega var undirritaður samstarfssamningur við Akraneskaupstað um að veita 66 nemendum úr Grundaskóla og kennurum þeirra húsaskjól í vetur meðan á húsnæðishrakningum stendur þar á bæ. Það er mjög ánægjulegt að geta orðið að liði,“ segir skólameistari.

Líf og fjör

Steinunn Inga Óttarsdóttir

Steinunn Inga segir að nú hefjist fjórða önnin þar sem smitvarnir setja svip á nám og kennslu hér á landi en eins og margir muna var öllum framhaldsskólum skellt í lás 13. mars 2020. „Það reyndi virkilega á kennara, nemendur og stjórnendur að halda dampi í ástandinu sem varað hefur síðan meira og minna og kennslan var útfærð ýmist í stað- eða fjarnámi eftir aðstæðum. Eins og staðan er núna er grímuskylda á göngum skólans, sprittað og eins metra fjarlægðarregla. Þó tókst í liðinni viku að fara með stóran hóp í nýnemaferð sem var innan samkomutakmarkana, með grímuskyldu og útileikjum, og var það sannarleg kærkomið og fjörugt. Nýnemar sem byrjuðu í fyrra fóru einnig í ferð en ekki var hægt að bjóða upp á það við skólabyrjun þá. Þá er fyrirhugað að fara með nemendahópa í heimsókn í Ljósafossvirkjun og í leikhús, allt með fyrirvara um sóttvarnir. Ný stjórn nemendafélagsins, NFFA, kemur sterk til leiks og ætlar heldur betur að hressa upp á félagslíf nemenda sem hefur að mestu legið niðri vegna smithættu og samkomutakmarkana,“ segir Steinunn Inga.

Viðhald húsnæðis

Umsjónarmaður fasteigna hefur haft í mörg horn að líta vegna mikilla endurbóta á skólahúsnæðinu sem tekið hafa langan tíma, að sögn Steinunnar Ingu. „Loksins tókst að ljúka viðgerðum utanhúss á húsnæði málmiðngreina og þakviðgerðum á heimavist. Verið er að sinna margvíslegum endurbótum öðrum og viðhaldi innanhúss, m.a. á aðstöðu náms- og starfsráðgjafa og starfsbrautarnemenda. Elsti hluti húsnæðisins var upphaflega gamli gagnfræðaskólinn, B bygging er frá áttunda áratug síðustu aldar og nýjasta álman frá ca. 1988.“

Fjölbreytt námsframboð

Námsframboð í FVA er mjög fjölbreytt. „Mikil aðsókn er í húsasmíði, vélvirkjun og rafvirkjun enda aðstaðan góð og námið hagnýtt. Boðið er upp á lotunám í húsasmíði og vélvirkjun sem margir nýta sér og fer kennsla fram í húsasmíðinni um hverja helgi á þessari önn en nokkrar helgar og á miðvikudögum í vélvirkjun. Einnig er hægt er að læra til sjúkraliða í lotunámi. Í bóknámi eru öflugar stúdentsbrautir, hver með sínu sérsviði. Nú á haustönn eru margvíslegar valgreinar fyrir nemendur, m.a. FabLab í samstarfi við Nýsköpunarsetrið, flot í Bjarnalaug, íslenskar ástarsögur, ferðalag til Berlínar (með fyrirvara um Covid), ljósmyndun, hljóðtækni og leiklist. Þá er stór hópur nemenda í FVA sem stundar afreksíþróttaæfingar og fær svigrúm til þess í stundaskrá.“

Skuggakosningar

Þessa dagana stendur yfir undirbúningur svokallaðra Skuggakosninga; #Égkýs, þar sem nemendur í FVA kynnast ferlinu í kringum kosningar en tilgangurinn er að efla lýðræðisvitund og hvetja ungt fólk til að kjósa eftir upplýstri ákvörðun.

„Fjörið heldur áfram, það er engan billbug að finna í FVA, hvorki á starfsfólki né nemendum að sögn skólameistara. Við þökkum fyrir hvern dag sem líður án þess að smit komi upp í skólanum. Fyllstu varúðar er gætt og sóttvarnir viðhafðar í hvívetna, þannig stuðlum við saman að því að fjari undan faraldrinum. Á meðan heldur lífið áfram sinn vanagang,“ segir Steinunn Inga Óttarsdóttir skólameistari.

Fjör í Fjölbraut við upphaf skólastarfs