Framundan eru tvennir tónleikar í Vinaminni á Akranesi. Kalman listafélag nýtur góðs af Jazzhátíð Reykjavíkur sem er nýhafin og mun teygja anga sína á Akranes.

Fyrri tónleikarnir eru mánudaginn 30. ágúst kl. 20. Þar er á ferðinni Oddrún Lilja Jónsdóttir, sem kemur hér fram undir nafninu LILJA. Hún er íslensk/norsk tónlistarkona sem mestan part ævinnar hefur búið í Osló fyrir utan tvö ár í Reykjavík. Tónlistin sem flutt verður er innblásin af ferðum Oddrúnar Lilju víða um heim en hún hefur leikið staðtengda tónlist með músíköntum margra landa. Meðal annars hefur hún spilað með ragatónlistarfólki á Indlandi, gnawatónlistarfólki í Marokkó, sirkuslistamönnum í Eþiópíu og palestínsku tónlistarfólki í flóttamannabúðum í Líbanon. Með LILJU spila þau Sanne Rambags, Sunna Gunnlaugsdóttir, Jo Skaansar og Erik Qvick.

Seinni tónleikarnir eru miðvikudaginn 1. september kl. 20. Íslensk/norski jazzkvartettinn ASTRA er nokkuð nýr af nálinni og var stofnaður með það í huga að hnýta saman íslensku og norsku jazz senuna með því að skapa samvinnu sem væri einstök og landamæralaus.

Astra skipa þeir Sigurður Flosason, Andrés Þór, Andreas Dreier og Anders Torén.

Miðasala er á tix. is og er almennt miðaverð kr. 3.000 en Kalmansvinir fá miðann á 2.000 kr. Einnig er hægt að nálgast miða við inngang.

https://tix.is/is/event/11908/lilja/

https://tix.is/is/event/11895/astra-jazzkvartett-in-orbit/

Tvennir jazztónleikar á Akranesi í vikunni