Ákveðið hefur verið í atvinnuvegaráðuneytinu að fela Landbúnaðarháskóla Íslands að móta tillögu að fæðuöryggisstefnu fyrir Ísland. Kristján Þór Júlíusson ráðherra og Ragnheiður I. Þórarinsdóttir, rektor Landbúnaðarháskóla Íslands, hafa undirritað samning þess efnis. Til grundvallar stefnumótuninni liggur meðal annars skýrsla Landbúnaðarháskólans um fæðuöryggi sem skilað var til ráðuneytisins í febrúar 2021. Skólanum er einnig ætlað kynna sér sambærilega stefnumótun í nágrannalöndunum og gildandi þjóðaröryggistefnu stjórnvalda að því marki sem hún snertir fæðuöryggi og afla annarra nauðsynlegra gagna til að stefnumótunin verði sem best úr garði gerð. Drög að stefnunni eiga að liggja fyrir í apríl 2022.

Í framangreindri skýrslu kom fram að innlend matvælaframleiðsla stendur fyrir stórum hluta fæðuframboðs á Íslandi og þá sérstaklega próteini. Garðyrkjan sér fyrir um 43% af framboði grænmetis og búfjárrækt um 90% af kjöti, 96% af eggjum og 99% af mjólkurvörum. Fjallað er um veikleika íslenskrar matvælaframleiðslu og lagt mat á áhrif þess ef upp kæmi skortur á aðföngum sem nauðsynleg eru fyrir framleiðsluna.

Í skýrslunni er enn fremur farið yfir það til hvaða þátta ætti helst að horfa við mótun fæðuöryggisstefnu sem eru meðal annars mat á eftirfarandi þáttum:

Nauðsynlegt framboð með tilliti til fæðutegunda og magns.
Þörf fyrir auðlindir og innviði til framleiðslu, svo sem ræktunarland og fiskistofna auk nauðsynlegrar þekkingar og tækjabúnað til framleiðslu.
Nauðsynlegar birgðir lykilaðfanga svo sem eldsneytis, áburðar og fóðurs sem og birgðir matvæla sem nauðsynlegar eru fæðuöryggi en ekki er raunhæft að innlend matvælaframleiðsla geti framleitt.

LbhÍ mun stýra vinnu um gerð fæðuöryggisstefnu