„Við vorum í Flókadalsá og fengum þrjá laxa en hann var tregur að taka hjá okkur, 20 stiga hiti,“ sagði veiðimaður sem var að hætta í Flókadalsá í Borgarfirði undir lok síðustu viku. Áin hafði þá gefið 166 laxa. Skoðum aðeins stöðuna á svæðinu eins og hún var fyrir helgi. Einhverjar ár hafa bætt sig á milli ára en ekki aðrar.

Hvolsá og Staðarhólsá í Dölum hafa gefið um 70 laxa og helling af bleikju, veiðimenn sem voru þar um daginn fengu nokkra laxa og bleikjur. Veiðin hefur verið róleg á Skarðsströnd og Fellsströnd en 70 laxar höfðu veiðst í Búðardalsá, sama má segja um Flekkudalsá, þar er veiðin treg.

Gott skot kom í Laxá í Dölum öllum á óvart en skemmtilegt þegar maður á kannski ekki von á neinu. Laxá hafði gefið 370 laxa. Haukadalsá hafði gefið 277 en veiðimenn sem voru þar í vikunni sögðu mikið af fiski en eins og víða tæki hann lítið. Auðvitað þarf rigningar í marga daga og þá gæti allt farið á fleygiferð.

Miðá í Dölum er að komast í 100 laxa og hellingur af bleikju hefur veiðst í ánni. Líklega um 500 bleikjur. Það er víða fiskur í henni.

Haffjarðará hefur gefið gefið vel í sumar en 680 laxar eru komnir á land og fyrir skömmu veiddist 104 sentimetra fiskur í ánni. Það var erlendur veiðimaður sem fékk fiskinn á Nicolas Hill-Norton.

Hítará var komin í næstum 400 laxa og Langá 588 laxa en mikið er af fiski í Langá en það þarf veðurbreytingu þar eins og víða. ,,Fullt af fiski en mjög tregur,“ sagði Ingimundur Bergsson hjá Stangaveiðifélagi Reykjavíkur.

Gufuáin er komin í næstum 40 laxa og veiðimenn sem við hittum við ána um daginn voru að reyna. En það getur tekið á þessa dagana þegar fiskurinn hefur lítinn sem engan áhuga á agni veiðimanna.

Gljúfurá er komin í 140 laxa og Jóhann Gísli Hermannsson veiðimaðurinn klóki var að byrja veiði þar á fimmtudaginn í síðustu viku og var bjartsýnn á veiðina, en hann hefur ekki veitt þar áður, en víða hefur hann veitt. Hann var á aðalsvæðinu í Norðurá um næstsíðustu helgi og fékk fimm laxa en Norðurá hafði gefið 1230 laxa undir lok síðustu viku. Sem er betri veiði en í fyrra. Þverá var komin yfir þúsund laxa og verður líklega með töluvert betri veiði en í fyrra.

Grímsá er komin með næstum 500 laxa og það er mikið af fiski víða í henni.

Laxá í Leirársveit er kominn með sömu veiði og í fyrra, eða 600 fiska. Og það er hellingur eftir af veiðitímanum.

Við veiðar í Hraunsfirði um síðustu helgi. Ljósm. mm.

Vatnaveiðin hefur víða verið ágæt. Laxar á Vatnasvæði Lýsu og í Hraunsfirðinum hefur bleikjan verið að gefa sig, einn og einn lax hefur verið að veiðast í Leirá í Leirársveit.

Það þarf rigningu, í marga daga, kannski viku til að allt fari á fleygiferð í veiðiánum. Haustið getur oft verið gott ef rignir hressilega og það hleypir lífi í veiðina. Ekki veitir af víða.

Nokkrar veiðiár að bæta sig á milli ára