Kvennalið ÍA sem hefur átt frekar rýrt keppnistímabil í sumar og voru stelpurnar því komnar í fallsæti í Lengjudeildinni fyrir leikinn gegn Grindavík sem fór fram á föstudagskvöld á Akranesvelli. Þurftu þær því nauðsynlega á sigri að halda í leiknum til þess að rífa sig upp töfluna. Það var nákvæmlega það sem þær gerðu og sigruðu Grindavík 3:2 í hörkuskemmtilegum leik og lyftu sér um leið upp í sjöunda sæti deildarinnar með 14 stig.

Skagakonur byrjuðu lekinn vel og náðu forystunni sanngjarnt þegar Bryndís Rún Þórólfsdóttir skoraði fallegt mark í fjærhornið á 29. mínútu leiksins. Heimakonur voru nær því að auka forystuna í hálfleiknum og komust næst því þegar þær áttu skot í þverslá undir lok hálfleiksins. Staðan í hálfleik 1:0.

Þær gulklæddu fengu draumabyrjun í síðari hálfleiknum þegar Unnur Ýr Haraldsdóttir kom þeim í 2:0 á 49. mínútu en þá fylgdi hún eftir stungusendingu inn fyrir vörnina og var rétt á undan markverði Grindvíkinga og náði að pota boltanum yfir marklínuna af miklu harðfylgi.

Þetta mark létti af pressunni hjá stelpunum og var leikurinn í járnum eftir það. Skagastúlkur virtust ætla að sigla sigrinum í land. En það átti eftir að breytast því Grindavíkurkonur voru allt í einu komnar inn í leikinn þegar Christabel Oduro náði að minnka muninn 13 mínútum fyrir leikslok á 77. mínútu og aðeins tveimur mínútum síðar voru þær búnar að jafna leikinn í 2:2 þegar Helga Guðrún Kristinsdóttir skoraði eftir að Christabel Odura lagði boltann fyrir fætur hennar fyrir opnu marki. En dramatíkinni var þar með ekki lokið. Því aðeins tveimur mínútum síðar kom Dana Joy Scheriff Skagakonum aftur yfir í leiknum með þriðja markinu 3:2 sem reyndist sigurmark leiksins. Mark hennar var afar glæsilegt; fast skot alveg út við stöng eftir að Erla Karitas Jóhannesdóttir átti sendingu á hana. Grindavíkurkonur sóttu hart að marki heimaliðsins á síðustu mínútunum og áttu meðal annars skot í stöng en Skagakonur héldu það út og og lönduðu mikilvægum sigri í æsispennandi leik og fögnuðu að vonum ákaft í leikslok sanngjörnum sigri.

Stelpurnar börðust vel allan leikinn og ætluðu sér sigur og uppskáru hann. Að öðrum ólöstuðum þá átti Dana Joy Scheriff mjög góðan leik, barðist vel og var það vel við hæfi að hún skoraði sigurmarkið til að kóróna frábæra frammistöðu.

Mikilvægur sigur hjá Skagakonum