Það er ekki á hverjum degi sem einn og sami leikmaðurinn skorar fimm mörk í leik. En það gerðist þegar að Fjölnir sigraði Víking Ólafsvík 7:0 í leik sem spilaður var á Ólafsvíkurvelli á föstudagskvöldið, en þá skoraði hinn tvítugi Jóhann Árni Gunnarsson fimm mörk.

Það var fátt sem benti til þess að leikurinn mundi enda sem martröð fyrir heimamenn í Ólafsvík, því Víkingarnir voru síst lakari aðilinn í byrjun leiks og sköpuðu sér nokkur álitleg marktækifæri á fyrsta hálftíma leiksins. En á 35. mínútu kom Jóhann Árni Fjölni yfir í leiknum með viðstöðulausu skoti í stöng og inn. Aðeins tveimur mínútum síðar fengu gestirnir vítaspyrnu eftir peysutog. Jóhann Árni steig á punktinn og skoraði örugglega og staðan allt í einu orðinn 0:2 og þannig stóð í hálfleik.

Víkingsmenn komu ákveðnir inn í síðari hálfleikinn og fengu sín færi og jafnræði var með liðunum en um miðjan hálfleikinn kom þriðja mark Jóhanns Árna og Fjölnis, en þá skoraði hann einn og óvaldaður innan vítateigs. Aðeins tveimur mínútum síðar var staðan orðin 0:4 þegar Andri Freyr Jónasson skoraði af stuttu færi. Við þetta varð uppgjöf hjá Víkingum og Fjölnismenn gengu á lagið. Á 74. mínútu skoraði Hans Viktor Guðmundsson fimmta markið. Jóhann Árni gerði síðan sjötta og sjöunda mark Fjölnis undir lok leiksins og stórsigur liðsins staðreynd.

Eftir góðan sigur Víkinga gegn Þór á Akureyri um síðustu helgi kom þetta stóra tap frekar óvænt. Guðjón Þórðarson þjálfari Víkings var að vonum svekktur í leikslok. Hann sagði í viðtölum eftir leikinn að fyrri hálfleikurinn hefði verið alveg ágætur og leikmenn staðið fyrir sínu. En sér hefði þótt sárt að sjá þessa algjöru uppgjöf sem varð í síðari hálfleiknum og Fjölnismenn fengu óáreittir að athafna sig.

Víkingur Ólafsvík vill örugglega gleyma þessum leik sem fyrst og er næsti leikur liðsins gegn Vestra á Ísafirði, þriðjudaginn 24. ágúst.

Fimm mörk frá Jóhanni Árna afgreiddu Víkinga