Í mars á þessu ári var haldinn kynningarfundur í streymi um skýrslu Verkís um nýja úttekt á húsnæði Grundaskóla á Akranesi. Skýrslan var unnin vegna grunsemda um ónóg loftgæði í skólanum. Helstu niðurstöður úttektarinnar voru að rakaskemmdir fundust víða í húsnæði skólans og sumstaðar höfðu þær leitt til myglu. Út frá því var aðgerðaráætlun hent af stað og ákveðið að stokka upp í skólastarfinu með tilliti til þessarar niðurstaðna. Uppstokkunin fól meðal annars í því að flytja þurfti stóran hluta nemenda í húsnæði utan skólans, svo sem í Þorpið og Arnardal, frístundamiðstöðina við Garðavöll, tónlistarskólann og fjölbrautaskólann. Alls þurfti skólinn að loka 22 skólastofum eða um tveimur þriðju af því rými sem hann hafði yfir að ráða. Starfsemi skólans fór því úr einni starfsstöð yfir í sjö undir lok síðasta skólaárs. Skessuhorn ræddi við Sigurð Arnar Sigurðsson skólastjóra.

Miklar endurbætur

Allt árið hefur Akraneskaupstaður staðið fyrir umfangsmiklum endurbótum á húsnæði skólans og áfram verður unnið að endurnýjun. Endurbótum og uppbyggingu lýkur í raun ekki fyrr en 2024, að sögn Sigurðar Arnar skólastjóra, sem er þó jákvæður og bjartsýnn í garð breytinganna. „Skólabygging Grundaskóla verður öll hin glæsilegasta og í takt við nýja tíma þegar framkvæmdum lýkur. Í dag snýst umræðan ekki um myglu eða rakaskemmdir heldur miklu frekar endurnýjun og uppbyggingu. Við höfum leyst þau alvarlegu vandamál sem hrjáðu okkur allt síðastliðið skólaár en búum vissulega enn við mikil þrengsli og byggingarframkvæmdir,“ segir Sigurður Arnar um framkvæmdirnar á vinnustaðnum sínum. „Við stöndum í miðju uppbyggingarferli og höfum þurft að endurskipuleggja allt starf okkar miðað við þann húsakost sem við ráðum yfir. Það er mikil framför frá fyrra skólaári en þegar verst lét starfaði skólinn í sjö byggingum. Það verða mikil þrengsli í vetur þar sem ein álman er úti vegna framkvæmda. Í stað þess hefur stjórnunarálmu verið breytt í kennsluhúsnæði og þrjár lausar kennslustofur eru væntanlegar við skólann í byrjun árs 2022,“ segir Sigurður Arnar í samtali við Skessuhorn. „Allir árgangar skólans verða í Grundaskóla á þessu skólaári fyrir utan 10. bekk sem hefur kennsluaðstöðu í FVA,“ bætir hann við.

Bjartsýnn á komandi skólaár

Grundaskóli er stór og öflugur skóli og einn fjölmennasti vinnustaðurinn á Akranesi og segir Sigurður Arnar ríkja almenna bjartsýni fyrir komandi vetur og framtíðinni almennt. „Starfsfólk hefur unnið frábært starf við krefjandi aðstæður. Jafnframt hefur Akraneskaupstaður og verktakar hreinlega unnið afrek á stuttum tíma. Við höfum endurskipulagt allt starf okkar og mótað framtíðaruppbyggingu skólans. Þrátt fyrir tímabundin húsnæðisvandræði í skólastarfinu hugsum við meira um að hverju er stefnt. Við stefnum hátt og innan fárra ára munum við eiga einn fallegasta skóla landsins,“ segir Sigurður Arnar ákveðinn. „Vonandi mun Covid ekki trufla okkur mikið en enn er óljóst hvernig heilbrigðisyfirvöld ætla að haga málum varðandi sóttvarnir í skólum. Daglega eru hátt í eitt þúsund manns í skólabyggingum okkar. Vegna þess er afar mikilvægt að allir leggist á eitt og hugi að persónubundnum sóttvörnum og fylgi leiðbeiningum sóttvarnayfirvalda. Við erum öll á sama báti í þessari baráttu,“ segir Sigurður Arnar að lokum.

Nemendafjöldi Grundaskóla er áætlaður um 680 nemendur og um 120 starfsmenn starfa hjá skólanum. Skólasetning er á mánudaginn og hefst kennsla samkvæmt stundaskrá þriðjudaginn 24. ágúst.

Grundaskóli fer úr sjö starfsstöðvum yfir í tvær fyrir komandi skólaár