Sigrún Hjartardóttir á Hátúni í Borgarfirði gaf nýverið út litið myndskreytt kver, eða bók, sem nefnist Lífshlaup. Bókin er ætluð börnum á leikskólaaldri og fyrstu árum grunnskóla og fjallar eins og nafnið bendir til um lífshlaupið; þegar líf kviknar og því lýkur. „Hugmyndin að þessu riti kviknaði þegar þegar ég sat hjá móður minni á líknardeild LSH, þar sem hún dvaldi síðustu vikur sínar á tíræðisaldri. Á líknardeildina komu einnig ung börn að heimsækja mömmu sína sem var við dauðans dyr, aðeins rúmlega þrítug. Þessi reynsla fékk mig til að hugsa um hvað við ættum erfitt með að tala um dauðann og ekki síður hvað börn vissu í raun lítið um það sem fyrir öllum á eftir að liggja,“ segir Sigrún.

Í kjölfar þessarar lífsreynslu fór Sigrún á netið og las sig til um ýmis rit og bækur sem gefnar hafa verið út um þetta málefni. Sótti sér innblástur og ákvað að skrifa sjálf litla en auðskilda bók sem ætluð er til lestrar fyrir börn þar sem fjallað er um lífshlaupið og dauðann. Til að myndskreyta bókina fékk hún til liðs við sig börn frá fjögurra ára aldri, öll með tengingu við Borgarfjörð, en Marín Ásta Hjartardóttir, þrítug frænka Sigrúnar, teiknaði forsíðumyndina. Bókin er gefin út á íslensku og pólsku þar sem Pólverjar eru stærsti hópur erlends fólks sem hér á landi býr. „Ég leitaði síðan stuðnings nokkurra fyrirtækja og heimila í heimabyggð til að koma bókinni út og fékk frábærar viðtökur við því. Bókina prentaði síðan Olgeir Helgi í Prentþjónustu Vesturlands í Borgarnesi í 400 eintökum. Nú er ég búin að senda bókina á leikskóla í öllum landshlutum, barnadeildir sjúkrastofnana, líknardeild LHS, í Ljósið og víðar. Þá tek ég við pöntunum í gegnum tölvupóst ef fólk vill nálgast eintak. Bókina sel ég á kostnaðarverði; 1.250 krónur en bæti auk þess við 250 krónum ef þarf að póstleggja hana.

Bókin er skrifuð fyrir börn á leikskólaaldri og á yngsta stigi grunnskóla. „Lífshlaup fjallar um hringrás lífsins; allt á sér byrjun, miðju og enda þess og á það við bæði um lífshlaup í dýra- og jurtaríkinu. Börn skilja ekki endilega dauðann og í ýmsum löndum er það jafnvel forboðið að ræða hann. Það á til dæmis við í Póllandi þar sem ég þekki nokkuð til. Ég fékk því pólska vinkonu mína til að þýða efni bókarinnar á móðurmál sitt. Ég vona svo að þessi litla bók geti hjálpað einhverjum en almennt er hugsun mín sú að auka umræðu og þekkingu barna á því að allt líf sem á upphaf á sömuleiðis endi. Það er hlutverk okkar fullorðna fólksins að útskýra fyrir þeim,“ segir Sigrún Hjartardóttir.

Þeir sem vilja kaupa eintak af bókinni Lífshlaupi er bent á að senda Sigrúnu tölvupóst á netfangið sigrun@heilsuhof.is

Gefur út bók fyrir börn sem hún nefnir Lífshlaup