Það var mikill hiti undir lokin í leik Skagamanna gegn Breiðablik í Kópavogi í Pepsí deild karla í knattspyrnu í gær. Þegar fjórar mínútur lifðu leiks var staðan 1:1 og allt benti til þess að Skagamenn væru að ná í dýrmætt stig í fallbaráttunni. Þá dæmdi dómari leiksins, Egill Arnar Sigurþórsson, umdeilda vítaspyrnu þegar Árni Vilhjálmsson féll í teignum eftir baráttu við Óttar Bjarna Guðmundsson. Árni steig á punktinn og skoraði af öryggi og tryggði Blikum sigur. En Egill Arnar dómari var ekki hættur. Áður en vítaspyrnan var tekin skokkaði hann út að hliðarlínunni að varamannabekk Skagamanna og sýndi Fannari Berg Gunnólfssyni þjálfara rauða spjaldið væntanlega fyrir munnsöfnuð. Tveimur mínútum eftir vítaspyrnudóminn sýndi hann Wout Droste sitt annað gula spjald og þar með rautt.

Skagamenn fengu óskabyrjun í leiknum þegar Hákon Ingi Jónsson kom þeim yfir á 6. mínútu leiksins. Gísli Laxdal Unnarsson átti þá fyrirgjöf fyrir markið sem Ísak Snær reyndi að að komast í en tókst ekki og boltinn barst til Hákons Inga sem skoraði af öryggi af stuttu færi.

Eins og við var að búast tók hið léttleikandi lið Blika leikinn yfir og sóttu af mikilli ákefð að marki Skagamanna. En leikskipulag Skagamanna var að liggja aftur og treysta á skyndisóknir, sem þeir leystu vel. En það kom þó ekki í veg fyrir það að Blikar jöfnuðu metin á 24. mínútu með marki frá Viktori Karli Einarssyni sem hann skoraði með föstu skoti eftir fyrirgjöf. Staðan 1:1 í hálfleik.

Seinni hálfleikurinn var keimlíkur þeim fyrri. Blikar meira með boltann og sóttu en Skagamenn vörðust vel. Heimamenn fengu engin afgerandi marktækifæri þrátt fyrir sóknarlotur sínar. Aftur á móti tókst Skagamönnum ekki að nýta sínar skyndisóknir þegar þær buðust. Eins og áður sagði stefndi í að Skagamenn næðu að krækja sér í dýrmætt stig þegar Breiðablik fékk vítaspyrnudóminn sem færði þeim sigurinn.

Allt Skagaliðið barðist vel og voru þeir Óttar Bjarni Guðmundsson og Wout Droste þeirra bestu menn. Skagamenn léku án þriggja lykilmanna, en þeir Viktor Jónsson og Steinar Þorsteinsson tóku út leikbann og Alex Davey var meiddur.

Í viðtali eftir leikinn sagðist Óskar Bjarni ekki fá nokkurn botn í þennan vítaspyrnudóm og liðið væri að vonum afar vonsvikið með þessa niðurstöðu eftir þá vinnu sem þeir settu í leikinn. Nú væru fimm úrslitaleikir eftir af mótinu og þeir munu leggja allt í þá leiki. Næsti leikur er gegn KR á Akranesvelli næstkomandi sunnudag.

Umdeildur vítaspyrnudómur réði úrslitum