Enn og aftur misstu Káramenn unninn leik niður í jafntefli í uppbótartíma þegar Leiknir frá Fáskrúðsfirði náði að jafna leikinn í 2:2 á þriðju mínútu í uppbótartíma. Liðin áttust við í Akraneshöllinni í gær. Káramenn urðu hreinlega að taka öll stigin í leiknum til þess eiga von um að bjarga sér frá falli. Fyrir leikinn munaði sex stigum á liðunum, en Leiknir er í þriðja neðsta sæti og Kári í því næstneðsta og því í fallsæti.

Káramenn byrjuðu af miklum krafti og voru komnir í 2:0 eftir sjö mínútna leik. Andri Júlíusson skoraði eftir aðeins þrjár mínútur eftir hornspyrnu og á 7. mínútu bætti Marinó Hilmar Ásgeirsson við öðru marki af stuttu færi og staðan því orðin vænleg. Í stað þess að fylgja eftir þessari góðu byrjun tvíelfdust gestirnir þess í stað og sóttu af mikilli ákefð að marki Kára og uppskáru mark á 26. mínútu þegar Stefán Ómar Magnússon skoraði með glæsilegu skoti í markvinkilinn, óverjandi fyrir Gunnar Braga Jónasson markvörð Kára, en Stefán Ómar er ekki ókunnugur á Skaganum því hann lék á sínum tíma með ÍA. Staðan því 2:1 í hálfleik.

Leiknismenn héldu uppteknum hætti í síðari hálfleik og sóttu stíft að marki Kára sem vörðust vel með Eina Loga Einarsson sem lykilmann í vörninni. Þegar allt virtist stefna í að Kára tækist að halda það út náði Inigo Albizuri Arruti að jafna í uppbótartíma með með skoti af stuttu færi eftir mikinn darraðadans inn í vítateig Kára.

Í stað þess að Kári næði að minnka muninn niður í þrjú stig á liðunum náðu Leiknismenn að halda sig enn sex stigum frá Kára í botnbarátunni. Káramenn voru að vonum svekktir í leikslok en það eru enn sex umferðir eftir og öll von er ekki úti ennþá. Eins og fjallað var um í Skessuhorni fyrir stuttu þá hefur stigasöfnun Skagaliðanna verið afleit á þessu sumri og sá ótrúlegi möguleiki er enn fyrir hendi að öll liðin muni falla um deild. Sem stendur eru þau öll í fallsæti, meistaralokkslið karla og kvenna hjá ÍA og svo Kári eins og áður sagði. En það eru enn sex umferðir eftir hjá liðunum og við skulum vona að þau nái öll að bjarga sér en róðurinn verður vissulega þungur.

Staða Káramanna orðin erfið