Vinnustofa í Frystiklefanum í Rifi í ágúst

Allir sem fylgst hafa með nýsköpun í dreifðum byggðum hafa líklega einhvern tímann velt því fyrir sér hvernig mætti skapa betri skilyrði til að stórhuga nýsköpun gæti blómstrað enn frekar, líka í fámennum byggðum. „Tunglskotin heim í hérað“ er yfirskrift vinnustofu, þar sem þetta verður rætt og skoðað ofan í kjölinn. Hún er samtal milli þeirra aðila sem koma að nýsköpun í dreifðum byggðum; frumkvöðla, stuðningsumhverfis, opinberra jafnt sem einkaaðila, rannsakenda og uppfræðara.

Von er á fólki hvaðanæva að af landinu og má búast við frjórri umræðu, sem mun vonandi skila nýrri sýn og nýjum leiðum til að styðja nýsköpun á landsbyggðinni. Er ekki hugsanlegt að í síbreytilegum heimi, felist ný tækifæri fyrir dreifðar byggðir? Tækifæri sem gætu haft jákvæð áhrif á framtíð íslenskra landsbyggða og jafnvel breytt framtíð heimsins?

Vinnustofan er hluti af verkefninu „Að rækta vistkerfi nýsköpunar í dreifðum byggðum,“ sem er stutt af „Markáætlun um samfélagslegar áskoranir“. Verkefnisstjóri er Arnar Sigurðsson, hjá fyrirtækinu Austan mána. Arnar var fyrsti forstöðumaður Blábankans á Þingeyri. Auk hans starfa við verkefnið Matthias Kokorsh, umsjónarmaður náms í sjávarbyggðafræðum við Háskólasetur Vestfjarða, Magdalena Falter hjá Hacking Hekla og Sigurborg Kr. Hannesdóttir hjá ILDI.

„Tunglskotin heim í hérað“ verður í Frystiklefanum í Rifi, dagana 20. – 21. ágúst nk. Takmarkað pláss er á vinnustofuna og því eru væntanlegir þátttakendur hvattir til að skrá sig sem fyrst. Sjá nánar í viðburði á Facebook.

-fréttatilkynning