Sett verður á fót sérstakt markaðsráð Skapandi Íslands, Listaháskólinn fer í nýtt húsnæði, stofnað verður rannsóknarsetur skapandi greina við Háskólann á Bifröst, Hagstofan mun birta menningarvísa og ritað hefur verið undir samning stjórnvalda og Listaháskólans um kvikmyndanám. Þetta er meðal aðgerða sem ríkisstjórnin kynnti í gær í þeim tilgangi að auka framgang skapandi greina.

Skapandi Íslandi er ætlað að auka þekkingu alþjóðlegs fagfólks á listum og skapandi greinum hér á landi, styðja við útflutning íslenskra listamanna og hins skapandi geira og auka þannig útflutningstekjur af listum og skapandi greinum. Sett verður á fót markaðsráð sem verður til ráðgjafar um verkefnið í heild sinni. Gert er ráð fyrir að verkefninu verði lagðar til níutíu milljónir króna árlega sem allar renna úr ríkissjóði. Íslandssstofa leggur til helming þeirrar fjárhæðar en mennta- og menningarmálaráðuneytið, utanríkisráðuneytið og atvinnu- og nýsköpunarráðuneytið hinn helminginn. Þá kom fram að unnið hefur verið að framtíðarlausn á húsnæðismálum Listaháskóla Íslands og kynnti ríkisstjórnin áform um að skólinn fái til afnota húsnæði í Tryggvagötu 19, þar sem Tollstjóri var áður til húsa.

Þá var undirritaður samningur forsætisráðuneytisins, mennta- og menningarmálaráðuneytisins, samgöngu- og sveitarstjórnarráðuneytisins og atvinnuvega- og nýsköpunarráðuneytisins við Háskólann á Bifröst um Rannsóknasetur skapandi greina. Ennfremur var undirritaður samningur mennta- og menningarmálaráðuneytisins við Listaháskóla Íslands um kvikmyndanám á háskólastigi. Með samningnum er hrundið í framkvæmd aðgerð í kvikmyndastefnu, sem kynnt var á liðnum vetri. Námið mun hefjast haustið 2022 og gert er ráð fyrir allt að 40 ársnemum.

Loks mun Hagstofa Íslands birta hagvísa fyrir menningu, listir og skapandi greinar í samræmi við stjórnarsáttmála ríkisstjórnarinnar. Með þeim má lesa hagræna mælikvarða tíu menningargreina (menningarvísa) á vef stofnunarinnar.

Skapandi greinum gert hærra undir höfði