Umhverfisganga verður í Stykkishólmi dagana 9. til 12. ágúst. Frá þessu segir á vefsíðu Stykkishólmsbæjar en í þessum göngum mun Jakob Björgvin Jakobsson bæjarstjóri, ásamt öðrum fulltrúum bæjarins, ganga með íbúum um hverfi Stykkishólmsbæjar og huga að nánasta umhverfi. Tilgangur umhverfisgöngu er að efna til samtals um nánasta umhverfi, hvað megi fara betur í frágangi og umhirðu bæjarins, auk þess að miðla upplýsingum frá Stykkishólmsbæ um framkvæmdir.

Síðast var umhverfisganga í Stykkishólmi árið 2019 en hún féll niður í fyrra vegna Covid-19. Í göngunni árið 2019 jókst þátttaka með hverju kvöldinu en alls mættu vel á annað hundrað manns. Út frá þeim umræðum sem áttu sér stað í göngunni og fór hvað mest fyrir má gera sér hug um hvað íbúum finnst að betur mætti fara í almennri umhirðu bæjarins og haga verkefnum í samræmi við það.

Mikil umræða var til að mynda um umferðaröryggi, leikvelli, gangstéttar og gönguleiðir í umhverfisgöngunni árið 2019. Á meðal þeirra verkefna sem búið er að vinna út frá athugasemdum sem bárust í göngunni má til dæmis nefna uppsetningu á nýjum leikvelli og frisbígolfvelli, göngustígar voru malbikaðir og lagfærðir víða um bæinn, niðurföll yfirfarin, bílastæðum fjölgað við leikskóla og margt fleira.

Fyrsta gangan verður í kvöld klukkan 19.00 um Borgarbraut og Flatir og klukkan 20.30 verður gengið um Skúlagötu, Ægisgötu, Tangagötu og Austurgötu.

Umhverfisganga í Stykkishólmi hefst í dag