Samtímamyndlistarhátíðin Plan-B hófst í gær í Borgarnesi og stendur til sunnudagsins 8. ágúst. Hátíðin fer fram í Borgarnesi og er til þess fallin að miðla samtímalist á landsbyggðinni en þar koma saman reyndir listamenn og minna reyndir í fjölbreyttum sýningum og viðburðum. ,,Plan B hefur alltaf þurft að finna lausnir en í ár höfum við, eftir reynslu síðasta árs í heimsfaraldrinum, sett saman „covidvæna“ og enn litríkari hátíð en áður,“ segir Sigrún Gyða Sveinsdóttir einn skipuleggjenda hátíðarinnar.

Mikil og þétt dagskrá verður í gangi laugardaginn 7. ágúst frá klukkan 13 og verður hægt að sjá sýningar í fimm sýningarrýmum og upplifa útiverk og gjörninga víðsvegar í bænum. Formleg opnun verður í Arionbanka klukkan 16:00 sama dag. Þegar hafa sýningar opnað á Kaffi kyrrð Blómakaffi og á Landnámssetrinu sem standa opnar ásamt öðrum sýningum út sunnudag. Á vefsíðu Plan-B www.planbartfestival.is má finna kort af Borgarnesi með upplýsingum um sýningarstaði, listamenn og tímasetningar á hverjum stað fyrir sig.

Gjörningaviðburður Plan-B verður haldinn á laugardagskvöld og hefst kl. 21:00. Viðburðinum verður streymt á vefnum og er opinn öllum óháð staðsetningu. Slóðina verður hægt að finna á vefsíðu hátíðarinnar www.planbartfestival.is Í beinu framhaldi af gjörningaviðburðinum verður streymi af þátttökupartíi þar sem ýmislegt óvænt mun birtast á skjánum. Listhóparnir ,,We are not romantic“ og King og Bong verða með gjörninga og Dj Karítas, resident dj á Prikinu, ætlar að þeyta skífum og halda stuðinu gangandi fram eftir kvöldi. Þá gefst fólki heima í stofu færi á að taka þátt í partíi hátíðarinnar í gegnum fundarbúnaðinn Zoom.

Hægt er að fylgjast með undirbúningi og því sem gerist bakvið tjöldin á Instagramreikningi og Facebook síðu hátiðarinnar @planbartfestival

Plan B hátíðin hafin í Borgarnesi