Æska landsins lætur sig svo sannarlega varða bágstödd börn í heiminum. Ýmsar frumlegar hugmyndir hafa orðið að veruleika í því sambandi. Þær Nikola og Tara, sem eru á leið í tíunda bekk í Grunnskólanum í Stykkishólmi, hafa fengið stjórnendur skólans og stóran hluta nemenda í lið með sér og stofnað öflugan stuðningshóp innan skólans í þágu SOS Barnaþorpanna. Hópurinn vinnur að góðgerðarmálum og er umbunað með skemmtilegri afþreyingu sem brýtur upp námið í skólanum.

Tilgangur stuðningshópsins er að halda fjáröflunarviðburði, sem ekki aðeins styðja SOS Barnaþorpin í verkefnum sínum í þágu barna víða um heim, heldur efla einnig samfélagslegan anda meðal nemenda í skólanum. Í viðtali sem birt er á heimasíðu SOS Barnaþorpanna sagði Nikola að viðtal sem hún sá í fréttablaði SOS á síðasta ári hafi veitt henni innblástur og að hana hafi langað til að gera eitthvað heima í Stykkishólmi fyrir SOS Barnaþorpin. Settur var upp peningakassi í skólanum sem krakkarnir settu í klink sem þau áttu afgangs frá sjoppuferðum eða hafa safnað með fjáröflunum eins og sölu á kökubakstri eða eftir dósasöfnunarkeppni.

Nemendum umbunað fyrir hvern áfanga

Nikola og Tara byrjuðu á að halda kynningar um SOS Barnaþorpin fyrir alla bekkina í skólanum og áhugi nemenda var mikill. „Við hengdum plaköt út um allt í skólanum svo nemendur komust eiginlega ekki hjá því að sjá þetta. Þeir fóru svo að lesa meira um þetta og það skráðu sig fimm nemendur fyrir þátttöku fyrsta daginn. Tveimur vikum síðar voru þeir orðnir 60 talsins,“ segir Nikola og lýsir því hvernig nemendur hafi sökkt sér í verkefnin í framhaldinu.

Þegar peningurinn í klinkkassanum náði náð yfir ákveðna línu í kassanum var nemendum umbunað. „Í hvert sinn sem við náum upp að næstu línu í kassanum fáum við að gera eitthvað skemmtilegt eins og t.d. að poppa.“ Fyrir ofan söfnunarbaukinn er hugmyndakassi sem nemendur geta sett í hugmyndir sínar fyrir fjáröflunarleiðir, verðlaun fyrir leiki og hvað eina sem snertir SOS stuðningshópinn. Tugir þúsunda króna höfðu safnast áður en sumarfrí hófst.

Hvetur fleiri skóla til að gera slíkt hið sama

Nikola hvetur fleiri skóla á landinu til að setja á laggirnar álíka stuðningshópa fyrir SOS Barnaþorpin. „Við erum skóli svo við erum mjög mörg og getum því gert meira. Við höfum mjög mörg tækifæri til að gera eitthvað inn á milli lærdómsins. Þetta skapar skemmtilegar athafnir í skólanum og um leið erum við að hjálpa. Ef það myndu fleiri skólar gera eitthvað svona þá getum við safnað meiri pening og hjálpað fleirum,“” segir Nikola að lokum.

Sjá videoviðtal við Nikolu hér.

Stofnuðu hóp í þágu SOS í Grunnskóla Stykkishólms