Með vænan fisk úr Flekkudalsá.

Stórlax í Flekkudalsá og víða er fisk að fá

Flekkudalsá á Fellsströnd í Dölum á sérstakan stað í hjarta margra veiðimanna. Veiðisvæðið er fjölbreytt og fallegt. Þorgils Helgason var við veiðar í ánni fyrir stuttu og segir svo frá:

„Veiðin í Flekkudalsá hefur farið rólega af stað eins og víðast hvar á landinu. Hollið sem lauk veiðum í dag landaði fimm löxum og missti annað eins. Ástundun var róleg og veðrið æðislegt. Komnir voru 28 laxar á land. Alltaf fallegt að koma í Flekkuna og gott að vera en vonandi fer veiðin aðeins batnandi á komandi dögum.“ Móðir Þorgils, Margrét Lísa, fékk sinn stærsta lax á ferlinum í ferðinni; stórglæsilega 85 cm hrygnu sem lét heldur betur fyrir sér hafa. Þvílík átök og taka hjá hrygnunni sem rauk út um allan hylinn, stökk í þrígang en var loks landað aðeins fyrir neðan. Hrygnan tók rauðan Frances nr 12.

Líkar þetta

Fleiri fréttir