Í byrjun júní birti Skessuhorn frétt um svokallaðan símakulda hjá ábúendum á Ölkeldu í Staðarsveit. Kristján Þórðarson bóndi segir að þau hafi síðustu tvo áratugi þurft að búa við það að nánast ekkert farsímasamband væri á svæðinu og eru þetta alls fimm bæir þarna í sveitinni sem eiga við þennan vanda að etja. Þetta eru auk Ölkeldu; Furubrekka, Foss, Álftavatn og Lindarbrekka.

Blaðamaður Skessuhorn heyrði í Kristjáni á mánudaginn og spurði hvort eitthvað nýtt væri að frétta af þessu máli. Kristján segir að ekkert hefði breyst ennþá en hins vegar væri komið upp mastur á Furubrekku og hann bindi vonir um að það sé í skoðun að bætt verði úr. Þó hefði hann viljað hafa mastrið frekar á vitanum á Kirkjuhóli því hann telji að hóllinn á Ölkeldu trufli merkið frá Furubrekku til Álftavatns. „Bæjarstjórinn okkar, Kristinn Jónasson, er búinn að vera að tætast í þessu og maður hefur heyrt það út undan sér að það eigi að laga þetta á næstu vikum,“ segir Kristján. Hann sagði að lokum að hann væri orðinn nokkuð vongóður um að ástandið færi að breytast og að hlutirnir komist loksins í betra lag.

Í framhaldinu sendi blaðamaður fyrirspurn á Neyðarlínuna til að athuga hver staðan væri hjá þeim í þessu máli. Þar varð fyrir svörum Þórhallur Ólafsson, framkvæmdastjóri 112. Hann sagði að væntanlega væri komið samband á Ölkeldu og á svæðið þar um kring vonandi hjá öllum símafélögunum. Neyðarlínan hafði milligöngu um þetta verkefni sem væri talsvert flókið hvað varðar reiki milli símafélaganna en Fjarskiptasjóður styrkti verkefnið að sögn Þórhallar.

Kristján á Ölkeldu gaf lítið út á þessi ummæli framkvæmdastjóra 112 og sagði að þetta væri ekki rétt hjá honum. Það væri vissulega kominn upp sendir á Furubrekku en hann hefði heyrt að eins og er væri bara komið samband hjá þeim sem væru hjá símafyrirtækinu Nova. Hins vegar væri dóttir þeirra hjá þeim núna og væri hjá Nova en ekkert hefði breyst í sambandsmálum hjá henni né þeim sjálfum, en þau væru bæði með síma hjá Símanum og Vodafone.

Blaðamaður heyrði þá í Þórhalli á nýjan leik og sagði hann að þetta væri mjög flókið mál en meiningin væri að fara fljótlega í Staðarsveitina að mæla til að sjá hvernig staðan er nákvæmlega. Eitt fyrirtæki sér um þessar mælingar en eins og staðan er núna eru alls tuttugu staðir víða um land sem bíða eftir að fá mælingu. Þórhallur sagði að lokum að þeir væru að reyna allt sem þeir gætu til að þjónusta almenning gagnvart öryggissjónarmiðum og ætti von á að þetta mál leystist á næstu vikum og í síðasta lagi í haust.

Símakuldi ennþá á Ölkeldu og nágrannabæjum