Englendingavík í Borgarnesi. Ljósm. Englendingavík.

Sturlast í Englendingavík um helgina

Laugardaginn 31. júlí mun hin nýstofnaða hljómsveit Sturlast halda uppi stuðinu í Englendingavík í Borgarnesi. „Okkur langar bara að gera eitthvað til að létta lund,“ segir Halldór Hólm hljómsveitarmeðlimur í Sturlast. Ásamt honum í hljómsveitinni eru Villi Goði sem hefur meðal annars verið í Buff og Todmobile, Gunni sem var áður í Bermuda Reagie On Ice, Kiddi sem var meðal annars í Ber og Spútnik og svo loks Halli sem að hans sögn hefur verið í alltof mörgu. „Við erum allir búnir að vera í bransanum í tugi ára. Við ætlum að hafa nóg af húmor og fíflagangi á laugardaginn og vonumst til að sjá sem flesta,“ bætir Halli við.

Tónleikarnir hefjast kl. 22:00 um kvöldið í Englendingavík. Aðgöngumiðinn á tónleikana kostar 1.500 kr. og hægt er að panta miða og taka frá pláss í gegnum Halla með því að senda honum skilaboð á Facebook. Passað verður upp á sóttvarnir á staðnum og er fólk sömuleiðis hvatt til að vera með grímur og passa upp á persónulegar sóttvarnir.

Líkar þetta

Fleiri fréttir