Skagamenn gerðu sér lítið fyrir og sigruðu Íslandsmeistara Vals 2:1 á Akranesvelli í Pepsi Max deildinni í gær. Þarna áttust við efsta lið deildarinnar og botnliðið. Eftir heldur dapurt gengi að undanförnu mættu heimamenn ákveðnir til leiks og gáfu allt í leikinn og voru einfaldlega betri aðilinn í fyrri hálfleik. Gáfu Valsmönnum engan frið á boltanum og vörðust vel þegar þess þurfti. Hinn ungi markvörður Skagamanna, Árni Marinó Einarsson, hafði lítið að gera í markinu, en bestu færin áttu Skagamenn undir lok hálfleiksins en þá varði Hannes Þór Halldórsson með því að slá skallabolta frá Ísak Snæ yfir markið og skömmu síðar skaut Steinar Þorsteinsson fram hjá eftir góða sókn og fyrirgjöf Jóns Gísla Eylands. Staðan því markalaus í hálfleik.

Skagamenn byrjuðu seinni hálfleikinn af krafti. Fengu nokkrar hornspyrnur í röð og úr einni þeirra skallaði Sebastian Starke Hedlund boltann í eigið mark aðþrengdur af Sindra Snæ Magnússyni eftir hornspyrnu Gísla Laxdals Unnarssonar. Valsmenn svöruðu þessu með snörpum sóknum. Úr einni þeirra átti Kaj Leo í Bartalsstovu þrumuskot í stöngina, þá nýkominn inn á sem varamaður. En Skagamenn voru ekki hættir. Á 65. mínútu átti Alex Davey langt innkast inn í vítateig Valsmanna og Viktor Jónsson skallaði boltann áfram á fjærstöngina og þar kom Sindri Snær Magnússon og átti fast skot sem stefndi í fjærhornið en þá kom Johannes Vall og þrumaði boltanum upp í þaknetið á eigin marki af marklínunni. Staðan orðin 2:0 og Skagamenn í draumalandi.

Eins og við var að búast sóttu Valsmenn af ákafa að marki heimamanna og náðu að minnka muninn á 73. mínútu þegar Kaj Leo í Bartalsstovu skoraði með góðu skoti upp í vinstra markhornið. Undir lokin fengu bæði lið mjög góð marktækifæri. Það fyrra fékk Aron Kristófer Lárusson þegar hann komst inn fyrir vörn Vals, en Hannes varði frekar laust skot hans af öryggi. En á lokamínútu leiksins átti Patrick Pedersen skot í stöng úr þröngu færi eftir að Árni Marinó lokaði vel á hann. Leiktíminn rann síðan út og Skagamenn fögnuðu vel fræknum sigri sem vonandi færir þeim það sjálfstraust sem þarf til þess að rífa sig af hættusvæðinu við botn deildarinnar.

Allt lið Skagamanna lék mjög vel, en þeir Alex Davey og Sindri Snær Magnússon áttu mjög góðan leik og Sindri var að leika einn sinn besta leik með ÍA.

Dómari leiksins, Jóhann Ingi Jónsson, dæmdi leikinn heilt yfir vel. En það vakti samt furðu margra að hann var mjög spar á spjöldin í fyrri hálfleik. Christian Kohler handlék boltann tvívegis í hálfleiknum og dæmd var aukaspyrna í bæði skiptin en engin spjöld og sömu sögu var að segja þegar Birkir Már Sævarsson braut gróflega á Gísla Laxdal Unnarssyni sem var að geysast í sókn. Aukaspyrna en ekkert spjald. En hann spjaldaði síðan fimm Skagamenn í síðari hálfleik fyrir oft litlar sakir.

Jóhannes Karl Guðjónsson þjálfari Skagamanna var að vonum ánægður í viðtölum eftir leikinn. Hann sagði að þeir hefðu verið ákveðnir í því að mæta Valsmönnum af krafti, þora að pressa þá. Í síðasta leik gegn Leikni hefði vantað þetta þor en úr því var bætt og væri hann mjög ánægður með frammistöðu strákanna, hann hefði alltaf sagt að það byggi mikið í þessum strákum og nú væri bara að fylgja þessum sigri eftir í næstu leikjum.

Góður sigur Skagamanna gegn Íslandsmeisturum Vals