Söngvaratvíeikið og góðvinirnir Friðrik Ómar Hjörleifsson og Jógvan Hansen hafa verið á heljarinnar tónleikaferðalagi hringinn í kringum landið síðustu vikurnar. Tónleikaröðin ber yfirskriftina Sveitalíf og verða tónleikarnir alls 30 talsins þegar ferðalagi þeirra félaga lýkur í ágúst. Þeir hafa flutt um borð í húsbíl á meðan ferðalaginu stendur og segja bæði ferðalagið og búskapinn hafa gengið nokkuð snurðulaust fyrir sig. „Það hefur gengið á ýmsu en engin stór áföll. Friðrik prófaði að keyra húsbílinn og innan við mínútu náði hann að keyra á kyrrstæðan bíl og tók stuðarann af honum í þokkabót,“ segir Jógvan Hansen um vin sinn. „Annars hefur búskapurinn í bílnum gengið vel.“

Kom í veg fyrir hræðilegt tískuslys

Félagarnir segja tónleikana hafa verið vel sótta í sumar og nokkurn veginn á pari við væntingar sínar. „Við erum að spila í þannig húsum að fjöldinn er frá 100-200 manns. Okkar skemmtun felst í vissri nálægð við áheyrendur. Við viljum ekki spila í stærri húsum en hinum týpísku félagsheimilum,“ útskýrir Friðrik Ómar.

Ferðalag sem þetta kallar á mikla og nána samveru, bæði upp á sviði og utan þess. „Við fáum ekki leið á hvor öðrum þó Jógvan geti verið óþolandi,“ svarar Friðrik Ómar kíminn. „Við höfum verið svo mikið saman síðastliðin ár að ég held að það sé fátt sem komi okkur á óvart í fari hvors annars. Það var kannski eitt atvik á dögunum sem hefði getað endað okkar vinskap. Þá rétt náði ég að stoppa Jógvan, fara út úr bílnum í klossum, svörtum sokkum, stuttbuxum og Hawaii skyrtu. Það hefði verið hræðilegasta tískuslys sem viðstaddir hefðu séð á ævi sinni,“ bætir hann við.

„Íslendingar eru stoltir sveitalubbar“

Friðrik Ómar og Jógvan hafa verið á ferðinni um hringveginn síðustu vikurnar og nálgast nú seinni hluta tónleikaferðalagsins. Hvaða staður hefur staðið upp úr til þessa? „Það var rosalega gaman að halda tónleika í Grímsey. Þar eiga áhyggjurnar ekki heima. Svo nutum við þess að skoða fuglalífið og drekka landa,“ svara vinirnir sem passa sig jafnframt að hvíla sig vel á milli tónleika til að safna kröftum. „Við pössum upp á það að hvíla okkur. Svo tölum við mikið um að hreyfa okkur, það hefur hjálpað rosalega mikið,“ bæta þeir við og hlæja.

Söngvararnir verða á Vesturlandi dagana 18.-24. júlí, fyrst í Búðardal, Snæfellsnesi: Stykkishólmi og Grundarfirði, svo í Borgarnesi og loks á Akranesi. En hvers mega Vestlendingar vænta sem koma á Sveitalíf? „Þeir munu sjá tvo vini sem ætla að gera sitt besta til að skemmta góðu fólki. Það var dásamlegt að koma í fyrra og okkur hlakkar mikið til að koma,“ svara félagarnir. Um er að ræða nokkurn veginn nýtt prógramm frá tónleikaröðinni í fyrra sem bar sama nafn, Sveitalíf. „Við gerðum boli þetta árið sem á stendur „ÉG ER SVEITALUBBI“. Þeir fást aðeins á tónleikunum en það er skemmst frá því að segja að þeir rjúka út. Íslendingar eru stoltir sveitalubbar. Það er ljóst,“ segja Friðrik Ómar og Jógvan að endingu.

Sjá nánar heilsíðuauglýsingu um tónleika þeirra félaga í Skessuhorni vikunnar.

Tónleikaröðin Sveitalíf væntanleg á Vesturlandið