Hnúðlaxar eru nú byrjaðir að ganga í laxveiðiárnar. Hafrannsóknastofnun barst hnúðlax sem Viktor Guðmundsson veiddi nýverið í Sogi við Syðri-Brú. Fiskurinn var hrygna 49,8 cm löng og 1596 grömm að þyngd. Hrygnan var komin nærri hrygningu en hrygningartími hnúðlaxa er mun fyrr en annarra laxa. Eins og sjá má á myndum líkjast hnúðlaxahrygnur sjóbleikju við fyrstu sýn en hnúðlax er með dröfnur í bakugga og á sporði sem nota má til aðgreiningar tegundanna.

„Mikilvægt er að auka þekkingu á dreifingu, líffræði og áhrifum hnúðlaxa. Óskar Hafrannsóknastofnun eftir því að fá sýni af hnúðlöxum og best er að fá heila fiska til rannsókna, mega vera frosnir. Sýni verða þá tekin til rannsókna m.a. á vaxtarhraða, kynþroska og erfðafræði. Veidda hnúðlaxa þarf að skrá í veiðibók eins og aðra veiði þar sem fram koma upplýsingar um veiðistað, dagsetningu, lengd og þyngd,“ segir í tilkynningu frá Hafró.

Hrygnan var 49,8 cm og 1596 gr. Þroskuð hrogn eru greinileg og farið að styttast í hrygningu.

Kalla eftir veiddum hnúðlöxum til rannsókna