Eins og flestum harmonikku unnendum er ljóst var landsmóti þeirra í Stykkishólmi frestað um ár. Það átti að fara fram í júní 2021 en verður vonandi haldið í júní á næsta ári. Ég hafði ásamt vinkonu minni pantað okkur leiguhúsnæði fyrir landsmótið eins og margir aðrir og stóð við þann ásetning minn að spila í Stykkishólmi á tilsettum tíma. Ég var svo heppinn að fleiri komu með nikkurnar og við spiluðum þarna meira og minna þrjá eða fjóra daga. Ég var þarna í viku og spilaði daglega, við áttum þarna yndislega daga í góðum félagsskap og langar að þakka það öllum vinum okkar og ekki síst íbúum Stykkishólms fyrir góða daga, bjarta og fallega, þrátt fyrir óvissa veðurspá. Þessu fylgja nokkrar vísur sem ég gerði um umhverfið.

Oft er bjart á Breiðafirði,

brosir Hólmur sólu við.

Er sem fögur fjöllin girði,

fagra sveitir mar og mið.

Hér sem best má andann yngja,

örva glóð í sinni sál.

Þar sem svanir kátir syngja,

saman kveða mærðarmál.

Helgafell í fornum sögum,

fyllir loftið undraóm.

Sveitin fyllist ljúfum lögum,

lífið öðlast töfrahljóm.

Þórsnes stendur út við eyjar,

öldur gjálfra blítt við strönd.

þar sem Hólmsins mætu meyjar,

muna æsku draumalönd.

Bestu þakkir og kveðjur kæru vinir.

Bogi Sigurðsson.

Kveðja frá Boga í Stykkishólm